Հայաստանում վերջին 1,5 տարվա ընթացքում կտրուկ իջել են վարկերի և ավանդների տոկոսադրույքները: Այս մասին այսօր՝ մայիսի 23-ին, ԱԺ-ում ՀՀ կենտրոնական բանկի գործունեության վերաբերյալ տարեկան հաղորդումը քննարկելիս նշեց ԱԺ փոխնախագահ Միքայել Մելքումյանը:
«Դոլարով վարկերի տոկոսադրույքը մոտ 8 տոկոս է, դրամով՝ 11-12 տոկոս: Ինչո՞ւ այդ հնարավորությունը չկար 4-5 տարի առաջ, որ պարագայում այդ հնարավորությունն առաջացավ: Ես համոզված եմ, որ մենք ունեցել ենք այդ հնարավորությունը: Ժամանակին դա չանելը հետ գցեց մեր տնտեսությունը, իսկ այն մարդիկ, որոնք 6-7 տարի առաջ վերցրել են բարձր տոկոսով վարկեր, այսօր խնդիրների մեջ են»,-ասաց Մելքումյանը:
Ի պատասխան ԿԲ նախագահն ասաց, որ իսկապես, 2014-ից մինչ օրս վարկերի տոկոսադրույքները իջել են 3,6-4,5 տոկոսով. «Ավանդների մասով կրճատվել է մարժան, այս պահին դրամայինի դեպքում այն կազմում է1,9 տոկոս, արտարժույթի դեպքում՝ 2 տոկոս: Այսինքն բանկային համակարգում շահութաբերության մակարդակը 2017-ի վերջին կազմել է 6 տոկոս, այն դեպքում որ այն կազմել է 9-10 տոկոս»:
ԿԲ նախագահը նշեց, որ Ճգնաժամի ժամանակ խիստ դրամավարկային քաղաքականություն են վարել, իսկ վերջին 2 տարում թուլացրել են այն, որի արդյունքում հաջողվել է դիմագրավել առկա մարտահրավերները եւ ապահովել գների կայունությունը ու ֆինանսական կայունությունը:
Արթուր Ջավադյանն անդրադարձավ նաեւ ավանդների ապահովագրման մեխանիզմներին՝ նշելով, որ ավանդների ապահովագրման շեմի բարձրացումը բերեց վստահության, կտրուկ աճեցին ավանդները: Նա նշեց, որ քննարկվում է նաեւ այդ շեմը էլ ավելի բարձրացնելու հնարավորությունը:
Նշենք, որ ավանդների ապահովագրման առավելագույն շեմը դրամայինի դեպքում 10 մլն դրամ է, արտարժույթի դեպքում՝ 5 մլն դրամ: