Վերջին շրջանում կապիտալի արտահոսքը մեծ ծավալներ չի ունեցել, խոսքը մի քանի տասնյակ մլն դոլարի մասին է: Այս մասին, այսօր՝ մայիսի 23-ին, ԱԺ-ում ՀՀ կենտրոնական բանկի գործունեության վերաբերյալ տարեկան հաղորդումը քննարկելիս նշել է ԿԲ նախագահ Արթուր Ջավադյանը:
«Ծառուկյան» խմբակցության պատգամավոր Կարինե Պողոսյանը նշեց, որ հասարակության մտահոգությունն է առաջացրել կապիտալի արտահոսքի մասին տեղեկությունները. «Արդյոք կանխատեսո՞ւմ էիք, որ կապիտալի խոշոր արտահոսք կլինի, և եթե այո՝ ի՞նչ քայլեր եք ձեռնարկել հնարավոր ռիսկերը մեղմելու համար»,- ԿԲ նախագահ Արթուր Ջավադյանին հարցրեց պատգամավորը:
Արթուր Ջավադյանն ի պատասխան նշեց. «Սա ոչ թե արտահոսք է, այլ ավանդների խզումներն են ավանդների, որ եղել են ժամկետից շուտ եւ արտահոսք է, որը կարող էր լինել նաեւ բնականոն: Դրա մեջ մտնում է նաեւ գործարարների կողմից արված փոխանցումները: Մենք հայտնաբերել ենք մի քանի երեւույթ. Այն փոխանցումները, որոնք գործարարները կարող էին անել մայիսի վերջին, արել են նաեւ ապրիլի վերջին: բայց հիմնականում դրանք կապված չեն երկրից արտահոսքի հետ: Կանխիկով երկրից արտահանելու սահմանափակումներ ունենք»:
Ջավադյանը նկատեց, որ ավանդների խզումներ նախկինում էլ եղել են. «Խոշոր բանկերում ավանդների խզումների թիվը սովորաբար 10-15 է, բայց եղան դեպքեր, երբ այդ թիվը հասավ 100, 200, 300-ի օրական կտրվածքով: Մայիսի 10-ից հետո շատ բարձր տեմպերով սկսեցին վերականգնվել ավանդները: Այս պահին խզված ավանդների 70 տոկոսը վերականգնվել են»:
Ջավադյանը նշեց, որ կարելի է սպասել ավանդների բազայի բարձրացման, դրա հաշվին կբարձրանան նաեւ վարկերի ծավալները: