Այս պահին բանակցություններ են ընթանում ռուսական կողմի հետ՝ ապահովելու նորմալ գազամատակարարումը։ Այդ մասին Ազգային ժողովում լրագրողների հետ զրույցում ասել է էներգետիկ ենթակառուցվածքների եւ բնական պաշարների նախարար Արթուր Գրիգորյանը։
Նա նշել է, որ բանակցությունները վարվում են եղածը պահպանելու եւ նոր առաջընթաց գրանցելու համար։
Դիտարկմանը, թե նախորդ նախարարները միշտ ասել են, որ հնարավոր չէ գազ գնել Իրանից, որովհետեւ թանկ են տալիս, Գրիգորյանը պատասխանել է, թե Հայաստանն Իրանից գազ չի գնում, փոխանակում է կատարում։ Ընդ որում, այս պահին հնարավոր չէ գազ գնել, անհրաժեշտ է ուսումնասիրել, իրավիճակը ամբողջությամբ հասկանալ, հետո որոշումներ ընդունել։
Հայկական ատոմակայանը առաջիկայում պլանային վերանորոգման է կանգնելու, արդյոք դա խնդիրներ չի հարուցի էլեկտրամատակարարման հարցում։ Այս հարցին Արթուր Գրիգորյանը պատասխանել է, թե Հրազդանի ՋԷԿ-ի 5-րդ բլոկը կլրացնի բացը, բացի այդ, Հայաստանը հոսանք է ներկրելու Վրաստանին, ուստի որեւէ խնդիր չի ծագելու։ Նախարարը նաեւ նշել է, թե այս պահին չի քննարկվում նոր ատոմակայան կառուցելու հարցը։