Հայաստանի կողմից «Տոր» մարտավարական զենիտահրթիռային համալիրի (ԶՀՀ) ձեռքբերման մասին տեղեկությունը գաղտնի է: Այս մասին մայիսի 23-ին ՀՀ Ազգային ժողովում կառավարության հետ հարց ու պատասխանի ժամին հայտարարեց ՀՀ վարչապետ Նիկոլ Փաշինյանը՝ պատասխանելով ՀՀԿ պատգամավոր Մհեր Հակոբյանի հարցին, թե երբ են Հայաստանի եւ Ռուսաստանի միջեւ պայմանավորվածություններ ձեռք բերվել «Տոր» տակտիկական զենիթահրթիռային համակարգերի ձեռքբերման մասին:
Վարչապետը նշել է, որ վերջերս Սոչիում ՌԴ նախագահ Վլադիմիր Պուտինի հետ կայացած հանդիպման ժամանակ քննարկվել է բոլոր ոլորտներում հայ-ռուսական հարաբերությունները խորացնելու անհրաժեշտությունը, այդ թվում՝ ռազմատեխնիկական: «Մենք հուսով ենք, որ այս համագործակցությունը ավելի ու ավելի արդյունավետ կդառնա: Եվ ես կարող եմ ասել, որ մեր ռուս գործընկերների հետ շատ լավ աշխատանքային կապեր են հաստատվել»,- ասաց կառավարության ղեկավարը: Նա նաեւ հավաստիացրեց, որ երկու երկրների ղեկավարների միջեւ փոխադարձ վստահություն կա, եւ այդ վստահությունը ժամանակի հետ կխորանա:
