ԱՄՆ առեւտրի նախարարությունը հետաքննություն է սկսել՝ պարզելու համար, արդյոք ավտոմեքենաների եւ ավտոպահեստամասերի ներմուծումն այլ երկրներից սպառնալիք է ստեղծում ԱՄՆ ազգային անվտանգության համար: Այս մասին նշվում է գերատեսչության կայքում հրապարակված հայտարարության մեջ, փոխանցում է «ՏԱՍՍ»-ը:
Փաստաթղթում նշվում է, որ հետաքննությունը, որի արդյունքում Վաշինգտոնը կարող է մաքսատուրքեր սահմանել նշված արտադրանքների համար, ԱՄՆ նախագահ Դոնալդ Թրամփի հետ հանդիպումից հետո նախաձեռնել է ԱՄՆ առեւտրի նախարար Ուիլբոչ Ռոսը: Հետաքննության մասին տեղեկացվել է նաեւ Պենտագոնի ղեկավար Ջեյմս Մեթիսը:
«Ապացույցներ կան առ այն, որ տասնամյակներ շարունակ ներմուծումը քանդել է մեր հայրենական ավտոմոբիլային արդյունաբերությունը: Առեւտրի նախարարությունը մանրակրկիտ, անկողմնակալ եւ թափանցիկ հետաքննություն կանցկացնի այն մասին, թե արդյոք այդ ներմուծումը թուլացնում է մեր տնտեսությունը եւ արդյոք սպառնում է ազգային անվտանգությանը»,- ասել է Ռոսը: Ինչպես նշվում է, մասնավորապես, կվերլուծվեն «ավտոմեքենաների, այդ թվում՝ ամենագնացների, ֆուրգոնների եւ բեռնատարների» մատակարարումները:
