ԱՄՆ նախագահ Դոնալդ Թրամփը չի ստորագրի ԱՄՆ միգրացիոն համակարգի բարեփոխման մասին օրինագիծը, եթե այն սահմանային հսկողության ուժեղացում եւ Մեքսիկայի հետ սահմանին պատի կառուցում չի նախատեսելու: Այս մասին երկրի ղեկավարն ասել է Fox News-ին տված հարցազրույցում, որից հատվածներ ցուցադրվել են հինգշաբթի օրը, փոխանցում է «ՏԱՍՍ»-ը:
«Եթե այս օրինագիծը իրական պատի կառուցման եւ սահմանի անվտանգության ամրապնդման մասին դրույթ չի պարունակելու, ապա իմ կողմից այն հավանություն չի ստանա»,- ասել է Թրամփը: Նա նշել է, որ այժմ Կոնգրեսում երկրի միգրացիոն համակարգի բարելավման տարբեր ասպեկտների վերաբերյալ չորս օրինագիծ է քննարկվում:
«Մենք կսպասենք եւ կտեսնենք, թե ինչ է տեղի ունենում: Ներկա պահին ամերիկացիների տրամադրությունները սահմաններին անվտանգության ամրապնդման օգտին են»,- շարունակել է նախագահը: Նա եւս մեկ անգամ ԱՄՆ-ի միգրացիոն օրենսդրությունը «աշխարհի ամենավատն» է անվանել՝ ընդգծելով անօրինական միգրանտներին ԱՄՆ սահմանը ապօրինի հատելու համար ձերբակալելուց հետո ազատ արձակելու պրակտիկայի դադարեցման անհրաժեշտությունը:
