Հայաստանի Հանրապետական կուսակցությունը չի հրաժարվում Ընտրական օրենսգրքի բարեփոխումների վերաբերյալ որեւէ քննարկումից: Այս մասին մայիսի 25-ին Ազգային ժողովում ավանդական ճեպազրույցի ժամանակ հայտարարեց ՀՀԿ խորհրդարանական խմբակցության ղեկավար Վահրամ Բաղդասարյանը:
Ըստ նրա, ՀՀԿ-ն պատրաստ կլինի բանակցել, եթե այդպիսի առաջարկ լինի. «Ինչ վերաբերում է Սահմանադրությանը, այստեղ ես որեւէ պատկերացումներով չեմ առաջնորդվում: Ես առաջնորդվում եմ Հայաստանի Հանրապետության Սահմանադրությամբ, եւ մենք բոլորս պետք է առաջնորդվենք միայն դրանով: Մենք պետք է առաջ գնանք միայն այն դեպքերում, երբ դա թույլ է տալիս Սահմանադրությունը: Իսկ ինչ վերաբերում է բանակցություններին, քանի դեռ չկան փաստաթղթեր, բանակցություններ եւս չեն լինի»,- ասաց Բաղդասարյանը՝ պատասխանելով լրագրողների՝ Հայաստանում արտահերթ խորհրդարանական ընտրությունների անցկացման հնարավորության մասին:
ՀՀԿ խմբակցության ղեկավարը շեշտեց, որ իրենք պատրաստվում են միայն Ազգային ժողովի հերթական ընտրություններին, որոնք տեղի կունենան 2022 թվականին: