Անհրաժեշտ է համաձայնության հասնել ընդհանուր քաղաքական երկխոսության շրջանակում, ինչի շնորհիվ մեխանիզմ կստեղծվի Ազգային ժողովի լուծարման համար: Այս մասին մայիսի 25-ին ՀՀ Ազգային ժողովում ավանդական ճեպազրույցների ժամանակ ասաց «Ելք» դաշինքի պատգամավոր Էդմոնդ Մարուքյանը:
Իսկ մինչ այդ, ըստ նրա, պետք է հնարավորություն լինի փոխել Ընտրական օրենսգիրքը, ինչը կարելի է անել միայն պատգամավորների 63 ձայնով: «Մեզ լայն քաղաքական կոնսենսուս է հարկավոր: ՀՀԿ-ում ասում են, որ նրանց օրակարգում այս հարցը դրված չէ: Այժմ այս թեմայի շուրջ բանակցություններ չեն տարվում»,- ասաց Մարուքյանը:
Նա նաեւ ընդգծեց, որ երբ կոնսենսուս ձեռք բերվի, ապա ամեն ինչ պարզ կլինի՝ չբացառելով այն հնարավորությունը, որ ՀՀԿ-ն եւ «Ելք»-ը կկարողանան համաձայնության գալ: Եթե դա տեղի ունենա, ապա, ըստ պատգամավորի, արտահերթ խորհրդարանական ընտրություններ հնարավոր կլինի անցկացնել աշնանը:
