Անգամ եթե ինչ-որ մտահոգություններ կան Զինված ուժերի գլխավոր շտաբի պետի պաշտոնում գեներալ-մայոր Արտակ Դավթյանի նշանակման հետ կապված, Արթուր Աղաբեկյանը կարող էր դրանք փոխանցել վարչապետին այլ խողովակներով, այլ ոչ թե հրապարակային: Այս մասին, այսօր՝ մայիսի 25-ին, ԱԺ-ում, ճեպազրույցների ժամանակ նշեց «Ելք» խմբակցության պատգամավոր Էդմոն Մարուքյանը:
Նշենք, որ Արցախի նախկին փոխվարչապետ, ՀՀ պաշտպանության նախկին փոխնախարար, գեներալ-լեյտենանտ Արթուր Աղաբեկյանը՝ անդրադառնալով Զինված ուժերի Գլխավոր շտաբի պետի պաշտոնում գեներալ-մայոր Արտակ Դավթյանի նշանակմանը, նշել էր. «Պարտավոր եմ ահազանգել, ամենաանպատրաստ գեներալը նշանակվել է ամենապատասխանատու պաշտոնին»:
«Մենք միշտ քննադատվել ենք նրա համար, որ՝ այ դուք այսինչ բանը հրապարակային ասեցիք, հարեւանները լսեցին: Եթե անգամ մտահոգությունները հիմնված են ինչ-որ փաստերի վրա, ապա դրանք պետք է փոխանցվեն այլ խողովակներով, որովհետեւ խոսքը զինված ուժերի գլխավոր շտաբի պետի մասին է: Նա կարող էր առաջին՝ հանդիպում պահանջել եւ հանդիպել Նիկոլ Փաշինյանի հետ: Երկրորդ, գաղտնի նամակով դիմել Փաշինյանին եւ իր մտահոգությունները փոխանցել»,-հայտարարեց Մարուքյանըէ՝ հավելելով, որ անթույլատրելի է ԶՈՒ գլխավոր շտաբի պետի մասին այդպես արտահայտվելը:
Ինչ վերաբերում է Արթուր Աղաբեկյանի կարծիքին, Մարուքյանն ասաց, որ չի կարող ասել, թե որքանով էր այն հիմնավոր կամ ոչ. «Ես գիտեմ, որ Փաշինյանն այդ նշանակումը կատարելիս բազմաթիվ կոնսուլտացիաներ է ունեցել եւ եթե հանգել է այդ տարբերակին, նշանակում է դրա մեջ կա տրամաբանություն, հիմքեր ու հիմնավորումներ»:
Նշենք, որ ՀՀ վարչապետի հրամանով Հայաստանի զինված ուժերի գլխավոր շտաբի պետ է նշանակվել գեներալ-մայոր Արտակ Դավթյանը՝ այդ պաշտոնում փոխարինելով Մովսես Հակոբյանին: