Հայաստանի ԱԻՆ-ում, այսօր՝ մայիսի 25-ին, ժամը 14:16-ին «911» ծառայությանն ահազանգ է ստացվել, որ Կոտայքի մարզի Եղվարդ քաղաքի կամրջի մոտ տեղի է ունեցել ավտովթար, ավտոմեքենան դուրս է եկել ճանապարհի երթեւեկելի հատվածից եւ գլորվել ձորը, կա տուժած. անհրաժեշտ է փրկարարների օգնությունը:
Դեպքի վայր է մեկնել ՀՀ ԱԻՆ ՓԾ հրշեջ-փրկարարական ջոկատից մեկ մարտական հաշվարկ:
Պարզվել է, որ Նոր Գեղի-Աշտարակ ավտոճանապարհի 7-րդ կմ-ի աջակողմյան հատվածում «Mercedes E» մակնիշի ավտոմեքենան (վարորդը՝ Նարեկ Ղ., ծնված 1996 թ.) դուրս է եկել ավտոճանապարհի երթեւեկելի հատվածից, մոտ 6 մ գլորվել ձորակը եւ բախվել գազատար խողովակին (խողովակը չի վնասվել):
Մինչ փրկարարների՝ կանչի վայր հասնելը, Ն. Ղ.-ին քաղաքացիների ուժերով դուրս են բերել ավտոմեքենայից եւ տեղափոխել Նաիրիի ԲԿ: Բժիշկները տուժածի առողջական վիճակը գնահատել են բավարար:
Փրկարարները հոսանքազրկել են ավտոմեքենան եւ փակել գազի բալոնի փականը: