Կոմպոզիտոր, Երեւանի ավագանու Հանրապետական խմբակցության անդամ Երվանդ Երզնկյանը իշխանափոխությունից հետո հասկացել է, որ վարչապետ Նիկոլ Փաշինյանը էքստրաօրդինար մարդ է։ NEWS.am–ի հետ զրույցում Երզնկյանը մեծ ոգեւորությամբ հայտարարեց, որ Փաշինյանը ժողովրդին վերադարձրել է հույսը։ Վստահեցրեց, թե նախկինում էլ հիացել է իշխանության դեմ պայքարի դուրս եկած ընդդիմադիր Նիկոլ Փաշինյանի խիզախությամբ։ Մինչդեռ Երզնկյանը նախկինում
ոչ միայն այդպիսի գնահատականներ չի հնչեցրել ընդդիմադիր Փաշինյանի մասին, այլեւ Երեւանի քաղաքապետի ընտրություններում սատարել է Փաշինյանի մրցակից Տարոն Մարգարյանին:
«Նկատեցի՞ք, որ էն մեր ջահել երեխեքը միտինգների ժամանակ ինչքան պայծառ դեմքեր ունեին։ ժողովրդի դիմագիծը փոխվում է։ Փաշինյանը կարողացավ հույս տալ մարդկանց։ Սա նրա ամենակարեւոր հերոսությունն է։ Հիմա իր ձեռքերը չի կարելի կապել։ Փաշինյանը խելոք մարդ է, համոզված եմ, որ ինքը մեր օգնությամբ կհասնի ինչ–որ բանի։ Ես իր մասին ամենալավ կարծիքին եմ»,–ասաց Երզնկյանը։
Հարցին՝ նախկին իշխանության օրո՞ք էլ էր Փաշինյանի մասին այս կարծիքին, Երզնկյանը պատասխանեց. «Նախկինում ասում էի՝ ինչ խիզախ մարդ է, դուրս է գալիս, սրանց հետ կռիվ է անում, հետո տեսա, որ ինքը կարողացավ այդ համառությունը տարիներ անց վերածել այս շարժմանը, հասկացա, որ ինքը էքստրաօրդինար մարդ է»։
Կոմպոզիտորը չցանկացավ խոսել նախկին իշխանության մասին, ոչ էլ Երեւանի քաղաքապետ Տարոն Մարգարյանի հրաժարականի անհրաժեշտության մասին, ցանկացավ խոսել միայն այսօրվա իրավիճակի մասին, Փաշինյանի եւ մշակութային գործիչների հանդիպման տպավորության մասին։ «Նիկոլ Փաշինյանը ճիշտ բան ասաց, որ կենսական պահանջ պիտի լինի թատրոն գնալու համար եւ այդ գործում մենք պետք է օգնենք։ Ստեղծվել է մի իրավիճակ, երբ որ մեծ կոլեկտիվներ ու արժանի կոլեկտիվները շատ չեն՝ նվագախմբերը, թատրոնները, բայց պետականորեն շատ ցածր վարձատրվող են։ Պատկերացնո՞ւմ եք բարձրակարգ երաժիշտները ստանում են 55 հազար դրամ»,–մտահոգվեց Երզնկյանը։
Մեր հիշեցմանը, որ նախկին իշխանության օրոք գործում էր ընտրովի հովանավորչությունը, ինչին հարմարվել էին մշակութային գործիչները եւ չէին բարձրաձայնում դրա մասին, արձագանքեց. «Ես չեմ սիրում էն հովանավորչությունը, որ արվում է մեր հաշվին, գողանում են մեզանից ու հետո մեզ հովանավորում։ Ավելի լավ է պետականորեն մի քիչ աջակցություն լինի, մեզ պետք է աշխատելու ֆրոնտ, մենեջմենթի ինստիտուտ, որ մեր ծրագրերը կարողանանք իրականացնել։ Օրինակ, իմ նվագախումբը հովանավորվում էր կառավարութան կողմից մի քիչ, իսկ հիմա մենք չունենք այս հովանավորություն, բայց մենք նայեցինք իրար ու ասեցինք՝ ոչինչ, մենք այդպես էլ կապրենք»։
Երեւանի ավագանու ՀՀԿ խմբակցության ներկայացուցիչը նկատել է՝ երկիրն ամբողջությամբ փոխվել է, ստեղծագործական մոտիվացիան՝ նույնպես։