Կոռուպցիոն բացահայտումների շղթան չի շրջանցել նաեւ գյուղապետերին:Օրեր առաջ ձերբակալվել է Գեղարքունիքի մարզի Մադինա գյուղի գյուղապետ Վրեժ Սարգսյանը:
Քննչական կոմիտեի նախագահի խորհրդական Սոնա Տռուզյանը NEWS.am-ին հայտնեց, որ մայիսի 21-ին Վրեժ Սարգսյանին ձերբակալել են ավելի քան 12 մլն դրամ վատնելու կասկածանքով։ Հաջորդ օրը՝ մայիսի 22-ին դատախազը արգելանքից ազատելու որոշում է կայացրել, Վրեժ Սարգսյանն ազատ է արձակվել ստորագրության դիմաց։
NEWS.am-ի տեղեկություններով, գյուղապետարանում կատարված ստուգումների արդյունքում բացահայտվել են ֆինանսական մի շարք չարաշահումներ: Վրեժ Սարգսյանի մեքենայությունների մասին Մադինայի բնակիչները բազմիցս բարձրաձայնել են, մամուլում էլ դրա մասին գրվել է, սակայն վերջինս իրավապահների ուշադրության տիրույթում է հայտնվել վերջերս:
Քրեական գործը հարուցվել է 2018-ի ապրիլի 10-ին Քրեական օրենսգրքի 179 հոդվածով (Յուրացնելը կամ վատնելը):
