Երեւանի քաղաքապետ Տարոն Մարգարյանը չի պատրաստվում հրաժարական տալ: Այս մասին այսօր՝ մայիսի 26-ին, լրագրողների հետ զրույցում ասաց ասաց Երեւանի քաղաքապետը՝ պատասխանելով այն հարցին, թե պատրաստվում է արդյոք հրաժարական տալ:
«Ոչ, ես բազմիցս եմ ասել եւ նորից եմ կրկնում, որ մենք ստացել ենք երեւանցիների վստահության քվեն, մեր ծրագրերը հավանության են արժանացել մեր բնակիչների կողմից եւ մենք շարունակում ենք մեր ծրագրերը կյանքի կոչել»,- ասաց նա:
Նա նշեց, որ իրենց թիմը պատրաստ է աշխատելուն, իրենք իրենց ծրագրերն ենք իրականացնում, ներկայացնում են իրենց կատարած աշխատանքները եւ անելիքների մասին են խոսում. «Թե հետագայում ինչ կլինի, այդ ժամանակ կխոսենք»:
Հարցին, թե հնարավոր է Երեւանի ավագանին իրեն անվստահություն հայտնի, քաղաքապետը վստահեցրեց, որ ՀՀԿ խմբակցությունը իրեն երբեք անցվստահություն չի հայտնի:
Նշենք, որ վերջին շաբաթվա ընթացքում Տարոն Մարգարյանի հրաժարականի պահանջով մի քանի անգամ բողոքի ցույցեր տեղի ունեցան քաղաքապետարանի դիմաց, ինչին ի պատասխան քաղաքապետի աջակիցներն էլ Տարոն Մարգարյանի պաշտպանելու ցույցեր կազմակերպեցին: