«Ամերիկայի ձայնը» պարսկական ծառայությանը տված բացառիկ հարցազրույցում ԱՄՆ պետքարտուղար Մայք Պոմպեոն հայտարարել է, որ եթե իրանական առաջնորդները համաձայնեին ԱՄՆ պահանջներին պահել իրենց ինչպես «նորմալ պետություն», ապա ամերիկացիները կայցելեին Իրան եւ այդ երկրին կվերաբերեին ինչպես բարեկամի։ «Եվ այն ժամանակ տեղի կունենար այն ամեն հրաշալին, որը տեղի է ունենում բարեկամների ու դաշնակիցների հարաբերություններում»,-նշել է նա։
Պոմպեոն հավելել է, որ «նորմալ» առաջնորդները չեն թալանում սեփական ժողովրդին եւ չեն ծախսում փողը Սիրիայում եւ Եմենում «արկածների» վրա։
Պետքարտուղարը մանրամասն կանգ է առել 12 պայմաններից մեկի վրա, որը նախկինում շարադրել էր նոր ռազմավարությանը նվիրված ելույթում։ Նա նշել է, որ Իրանը պետք է թույլ տա Ատոմային էներգիայի միջազգային գործակալությանը ստուգումներ անցկացնել Իրանի ռազմական օբյեկտներում եւ ուսումնասիրել լաբորատորիաները։
Պոմպեոն նաեւ հիշեցրել է Իսրայել պետությունը ոչնչացնելու սպառնալիքին վերջ դնելու պահանջի մասին եւ պահանջել դադարեցնել հարեւան պետությունների նկատմամբ ագրեսիվ պահվածքը։
Պոմպեոն շեշտել է, որ ԱՄՆ-ում չեն ձգտում Իրանի վարչակազմը փոխել եւ դա խորհուրդ չեն տալիս աքսորի մեջ գտնվող իրանական ընդդիմադիր խմբերին։