ԱՄՆ պետքարտուղար Մայք Պոմպեոն կարծում է, որ Վենեսուելայի կառավարությունը վախեցած է երկրի բնակչությանն օգնելուն ուղղված Վաշինգտոնի ջանքերից, փոխանցում է «ՏԱՍՍ»-ը:
«Մենք հերքում ենք այն մեղադրանքները, որոնք կանգնած են Վենեսուելայի նախագահ Նիկոլաս Մադուրոյի՝ մեր դիվանագտներին արտաքսելու որոշման հետեւում, եւ մենք երկու վենեսուելացի դիվանագետներին հանձնարարել ենք նույն կերպ հեռանալ Միացյալ Նահանգներից: Մենք վշտացած ենք, սակայն զարմացած չենք. ռեժիմը վախեցած է Վենեսուելայի ժողովրդին օգնելու մեր ջանքերից»,- Twitter-ի իր էջին հայտարարել է ԱՄՆ Պետդեպարտամենտի ղեկավարը:
We reject the accusations behind @NicolasMaduro’s decision to expel our diplomats, and we ordered two Venezuelan diplomats to leave the United States in kind. Disappointed, but not surprised, the regime is threatened by our efforts to help the people of #Venezuela.
— Secretary Pompeo (@SecPompeo) 27 мая 2018 г.
Կարակասի եւ Վաշինգտոնի մեջեւ հարաբերություններում լարվածությունը սրվեց մայիսի 20-ին Մադուրոյի՝ պետության ղեկավարի պաշտոնում վերընտրվելուց հետո: Միացյալ նահանգների նախագահ Դոնալդ Թրամփը հրամանագիր էր ստորագրել, որով ԱՄՆ քաղաքացիներին եւ Միացյալ Նահանգներում գտնվող անձանց արգելվում է գործարքներ իրականացնել Վենեսուելայի պետական պարտատոմսերի ձեռքբերման հետ կապված, ներառյալ՝ դեբիտորական պարտքերի:
Ուրբաթ օրը Վենեսուելայի իշխանությունները Մադուրոյի եւ ԱՄՆ սենատոր Բոբ Քորկերի (հանրապետական գործիչ՝ Թեննեսի նահանգից) հանդիպումից հետո որոշում կայացրեցին ազատ արձակել ամերիկացի Ջոն Հոլթին, որը 2016 թվականից ի վեր գտնվում էր կալանքի տակ: Հոլթի՝ ԱՄՆ վերադառնալուց հետո Վաշինգտոնը, այնուամենայնիվ, հայտարարել էր, որ չի պատրաստվում փոխել քաղաքականությունը Կարակասի նկատմամբ:
