Մուսալեռի մի քանի տասնյակ բնակիչներն այս պահին Երեւանից դեպի Սարդարապատ ճանապարհին, մայրուղու մոտ հավաքվել են, որ դիմավորեն ՀՀ վարչապետ Նիկոլ Փաշինյանին եւ շնորհավորեն Հանրապետության 100-ամյակի առիթով:

Նրանք իրենց հետ բերել են դրոշներ, Նիկոլ Փաշինյանի պատկերով մեծ պաստառ: Գյուղացիները նաեւ փոքր սեղան են գցել եւ աղ ու հացով սպասում են ՀՀ վարչապետին:

Մուսալեռի գյուղապետ Էդգար Հովհաննիսյանը NEWS.am-ի հետ զրույցում ասաց, որ սա ինքնաբուխ ակցիա է, գյուղացիներն են որոշել տոնի առթիվ շնորհավորել վարչապետին:

Նիկոլ Փաշինյանը տեսնելով կանգնած գյուղացիներին, իջավ մեքենայից: Գյուղացիները վարչապետին դիմավորեցին աղ ու հացով: Փաշինյանը նրանց հետ շամպայն խմեց, շնորհավորեց տոնի առթիվ, ասաց, որ ուշանում է ու շարունակեց ճանապարհը:

Նշենք, որ ուղիղ 100 տարի առաջ, 1918թ. մայիսին Ղարաքիլիսայում, Բաշ-Ապարանում եւ Սարդարապատում հայկական կանոնավոր ուժերին եւ կամավորականներին հաջողվեց կենաց եւ մահու ճակատամարտերում փայլուն եւ անհավանական հաղթանակ տանել թուրք հրոսակների դեմ` կասեցնելով նրանց առաջխաղացումը, որի արդյունքում Հայոց ազգային խորհուրդը Թիֆլիսում հռչակեց Հայաստանի անկախությունը:

Հայաստանի առաջին հանրապետությունը կարճ կյանք ունեցավ եւ 1920թ. դեկտեմբերի 2-ին բռնազավթվեց բոլշեւիկյան 11-րդ կարմիր բանակի կողմից:

1992թ.-ից մայիսի 28-ը պաշտոնապես նշվում է որպես Հանրապետության օր: