Հայաստանի նախագահ Արմեն Սարգսյանը, վարչապետ Նիկոլ Փաշինյանը, Արցախի նախագահ Բակո Սահակյանը, Ամենայն հայոց կաթողիկոս Գարեգին Երկրորդը ծաղկեպսակներ դրեցին Սարդարապատի հուշահամալիրին (ֆոտոռեպորտաժ):
Հիշեցնենք, որ Սարդարապատում տեղի է ունենում «Հաղթական դար» հանդիսավոր միջոցառումը՝ նվիրված Առաջին Հանրապետության եւ Սարդարապատի ճակատամարտի 100-ամյակլին, որի ժամանակ հայկական զորքերը հետ են մղել թուրք նվաճողներին:
Ծաղկեպսակները դնելու արարողությունից հետո Կաթողիկոսն աղոթք ընթերցեց:
Նշենք, որ ուղիղ 100 տարի առաջ, 1918թ. մայիսին Ղարաքիլիսայում, Բաշ-Ապարանում եւ Սարդարապատում հայկական կանոնավոր ուժերին եւ կամավորականներին հաջողվեց կենաց եւ մահու ճակատամարտերում փայլուն եւ անհավանական հաղթանակ տանել թուրք հրոսակների դեմ` կասեցնելով նրանց առաջխաղացումը, որի արդյունքում Հայոց ազգային խորհուրդը Թիֆլիսում հռչակեց Հայաստանի անկախությունը:
Հայաստանի առաջին հանրապետությունը կարճ կյանք ունեցավ, 1920թ. դեկտեմբերի 2-ին Հայաստանը խորհրդայնացավ:
1992թ.-ից մայիսի 28-ը պաշտոնապես նշվում է որպես Հանրապետության օր: