ԵՄ-ն եւս մեկ տարով երկարաձգել է պատժամիջոցները Սիրիայի իշխանությունների դեմ: Այս մասին երկուշաբթի Բրյուսելում ԵՄ երկրների արտգործնախարարների հանդիպումից հետո հայտնել է Եվրամիության մամուլի ծառայությունը:
«Խորհուրդը երկարաձգել է ԵՄ սահմանափակումները Սիրիայի վարչակարգի դեմ մինչեւ 2019 թվականի հունիսի 1-ը: Հաշվի առնելով շարունակվող ճնշումները քաղաքացիական բնակչության դեմ՝ ԵՄ-ն որոշում է կայացրել Սիրիայի նկատմամբ ԵՄ ռազմավարության համաձայն սահմանափակիչ միջոցներ ձեռնարկել սիրիական վարչակարգի եւ նրա կողմնակիցների նկատմամբ»,- նշվում է ԵՄ արտաքին գործերի խորհրդի եզրակացության մեջ:
Խորհուրդը նաեւ թարմացրել է ցուցակում ներառված որոշ անձանց եւ կազմակերպություններին վերաբերող տեղեկատվությունը եւ հանել է ցանկից երկու անձի, որոնք ավելի վաղ մահացել էին: Այժմ ցանկում 259 ֆիզիկական եւ 67 իրավաբանական անձ է ներառված: Վերջերս ավելացված ֆիզիկական անձինք ներառվել են քիմիական զենքի կիրառմանը մասնակցության համար: