Ավելի քան 40 հումանիտար կազմակերպություն, այդ թվում նաև նրանք, որոնք ՄԱԿ-ի համակարգի մաս են կազմույմ, հիշատակվել են 2002 թվականին Համաշխարհային կազմակերպության կողմից մարդասիրական օգնության տրամադրման դիմաց բնակչությունից սեռական ծառայություններ ստանալու դեպքերի վերաբերյալ պատրաստված զեկույցում: Այս մասին երեքշաբթի օրը հայտնել է The Times թերթը՝ վկայակոչելով 84 էջանոց զեկույցը, որը մինչ այս ամբողջությամբ երբեք չի հրապարակվել:

Ինչպես նշվում է փաստաթղթում, որից պարբերականում հատվածներ են ներկայացված, ընդհանուր առմամբ, հայտնաբերվել են տասնյակ կազմակերպություններ, «որոնց աշխատակիցները, ըստ հաղորդումների, շահագործման հիման վրա սեռական հարաբերություններ են ունեցել փախստական ​​երեխաների հետ»: Հիշատակված կազմակերպությունների մեծ մասը բավականին փոքր է, սակայն դրանց թվում կան նաեւ ՄԱԿ-ի խոշոր գործակալություններ, ինչպիսին են ՄԱԿ-ի՝ Փախստականների հարցերով գերագույն հանձնակատարի վարչությունը (UNHCR), Համաշխարհային պարենային ծրագիրը եւ Կարմիր խաչի ու Կարմիր մահիկի (IFRC) միությունների Միջազգային ֆեդերացիան եւ այնպիսի միջազգային ՀԿ-ներ, ինչպիսիք են «Բժիշկներ՝ առանց սահմանների» կազմակերպությունը, Փախստականների հարցերով նորվեգական խորհուրդը, Save the Children-ը, փոխանցում է «ՏԱՍՍ»-ը:

Զեկույցը հիմնված է 2001 թվականին Արեւմտյան Աֆրիկայում փախստականների ճամբարներում UNHCR-ի եւ Save the Children-ի կողմից իրականացված հետաքննության վրա: Չնայած զեկույցում շեշտվում է, որ այս բոլոր մեղադրանքները լիովին չեն ուսումնասիրվել եւ հետագա հետաքննություն են պահանջել, սակայն «միեւնույն ժամանակ, փաստաթղթավորված հաղորդումների քանակը խնդրի մասշտաբների կարեւորագույն ցուցանիշն է»:

UNHCR է փոխանցվել 67 անձից բաղկացած նախնական գաղտնի ցուցակ, ովքեր կարող էին ներգրավված լինել նման գործողություններում: The Times-ի տվյալներով՝ նրանցից միայն 10-ն է հեռացվել, իսկ մնացածի նկատմամբ ոչ մի քայլ չի ձեռնարկվել: