Ֆինանսական լրագրողների տարածաշրջանային «Ռուբլու գոտի» («Рублёвая зона») մրցույթը անցկացվում է 2014 թվականից, ընդ որում՝ տարին երկու անգամ՝ աշնանը եւ գարնանը Ռուսաստանի տարբեր քաղաքներում։ Մրցույթի աշնանային փուլին մասնակցում են զանգվածային լրատվամիջոցները, իսկ գարնանը՝ աշխատանքների հեղինակները։ Մրցույթի գլխավոր գործընկերը Ռուսաստանի լրագրողների միությունն է, իսկ ֆինանսական գործընկերը եւ կազմակերպիչը՝ TeleTrade ընկերությունների խումբը։
Նախորդ տարի աշնանը կայացած մրցույթի ժամանակ նոր անվանակարգ է բացվել՝ «Օտարերկրյա լրատվամիջոցներում լավագույն հատուկ նախագիծը ֆինանսական շուկաների մասին»։ Մասնակցելով մրցույթին՝ NEWS.am լրատվական-վերլուծական գործակալությունը դուրս է եկել եզրափակիչ եւ զբաղեցրել է պատվավոր երրորդ տեղը նշված անվանակարգում։
Այս տարվա մայիսին ավարտվել է Ֆինանսական լրագրողների տարածաշրջանային «Ռուբլու գոտի» մրցույթի գարնանային մրցաշրջանը։ Մրցույթին մասնակցելու համար դիմել էին ռեկորդային 414 հեղինակներ՝ ինչպես Ռուսաստանից, այնպես էլ մի շարք այլ երկրներից։ Ուստի, լուրջ մրցակցություն է ծավալվել, իսկ ժյուրի համար հեշտ չի եղել լավագույն աշխատանքների որոշումը։
Եվ ահա, մայիսի 25-ին Կրասնոյարսկ քաղաքում՝ Grand Hall Siberia համերգասրահում տեղի է ունեցել «Ռուբլու գոտի» մրցույթի գարնանային մրցաշրջանի հաղթողների պարգեւատրման արարողությունը։ Նշենք, որ «Օտարերկրյա լրատվամիջոցներում ռուսական տնտեսության եւ ֆինանսների մասին հրապարակումների լավագույն հեղինակ» անվանակարգում հաղթող է ճանաչվել մեր գործակալության աշխատակից Ալբերտ Խաչատրյանը՝ զբաղեցնելով 1-ին տեղը։
