Ստամբուլում 2018–ի ապրիլի 24–ին Հայոց ցեղասպանության զոհերի հիշատակին նվիրված միջոցառման մասնակիցների դեմ հետաքննությունը դադարեցվել է դատարանի որոշմամբ։
Թուրքական T24.com կայքի փոխանցմամբ՝ թուրքական դատարանը բերման ենթարկված ակտիվիստների նկատմամբ հետաքննությունը դադարեցնելու եւ ազատ արձակելու որոշում է կայացրել։ Դատարանը որոշումնը հիմնավորել է «Հայոց ցեղասպանություն» արտահայտությունը խոսքի ազատության շրջանակներում օգտագործելու հնարավորությամբ։
Նշենք, որ այս տարվա ապրիլի 24–ին Ստամբուլում կազմակերպված սգո միջոցառման ժամանակ ոստիկանները բերման էին ենթարկել Հայոց ցեղասպանությունը դատապարտող պաստառներ բռնած ակտիվիստների։ Դատախազությունը նրանց մեղադրանք էր ներկայացրել «ժողովրդի մեկ այլ հատվածի նկատմամբ քեն ու ատելություն սերմանելու մեջ»։