Վերջին 10 տարում Հայաստանում վարկային տոկոսադրույքները կայուն կերպով նվազել են: Այս մասին, այսօր՝ մայիս 30-ին, Կենտրոնական բանկի 2017 թ. Ֆինանսական կայունության հաշվետվությունը ներկայացնելիս ասաց ԿԲ ֆինանսական համակարգի կայունության եւ զարգացման վարչության պետ Անդրանիկ Գրիգորյանը՝ հավելելով, որ այդ նվազումը կազմել է 4 տոկոս:
Նրա խոսքով, 2017 թվականի ընթացքում պահպանվել են ֆինանսական համակարգի կապիտալիզացվածության ու իրացվելիության բարձր ցուցանիշները: Մասնավորապես, Հայաստանից արտահանվող մետաղների գներն են աճել: Աճել են նաեւ դրամական փոխանցումերը, իսկ առեւտրային բանկերը պահպանել են վարկային ընդլայնողական քաղաքականությունը:
Ինչ վերաբերում է ՀՀ վարչապետ Նիկոլ Փաշինյանի հայտարարությանը, թե պետք է ներվեն գյուղացիների վարկային բեռից եկած տուգանքները, Անդրանիկ Գրիգորյանը նշեց, որ օրինագիծ է մշակվում, որով պետք է ներվեն գյուղատնտեսական վարկերից գոյացած քաղաքացիների տույժ-տուգանքները, սակայն այնպես պետք է արվի, որ բանկերը չտուժեն: