Երուսաղեմի հայ պատրիարք, արքեպիսկոպոս Նուրխան մՄանուկյանը նամակ է ուղարկել Քնեսեթի խոսնակ Յուլի Էդելշթեյնին։
Նամակում պատրիարքը խորը հիասթափություն է հայտնել խոսնակի որոշման կապակցությամբ՝ Քնեսեթի օրակարգից հանել Հայոց ցեղասպանության ճանաչման մասին բանավեճերը, չնայած այն հանգամանքին, որ անցած շաբաթ նա աջակցություն էր հայտնել այդ հարցին։
Չորեքշաբթի երեկոյան Էդելշթեյնը արքեպիսկոպոսին գրել է այդ հարցը քվեարկության դնելու մտադրության մասին, հենց որ խորհրդարանում մեծամասնություն ապահովվի, հայտնում է Haaretz-ը: «Հենց ես համոզվեմ, որ Քնեսեթում մեծամասնություն կա, որն անհրաժեշտ է պատմական ճանաչման համար, մենք այն քվեարկության կդնենք լիակազմ ժողովում: Ես իմ ուժերի սահմաններում ամեն ինչ կանեմ եւ հույս ունեմ, որ այդ ջանքերն իրենց պտուղը կտան»,- գրել է նա:
Քնեսեթի խոսնակ Յուլի Էդելշթեյնը այդ հարցը հանել է օրակարգից, որպեսզի խուսափի անախորժություններից, քանի որ հասկանալի չէ, արդյոք օրինագիծը կստանար խորհրդարանականների մեծամասնության աջակցությունը։ Էդելշթեյնը բազմիցս հայտնել էր, որ աջակցում է Հայոց ցեղասպանության ճանաչումը, այդ թվում անցած շաբաթ։
