Ժամանակին մատնահետքերով նույնականացման խնդիրը ուսումնասիրման առարկա հանդիսացել է։ Այս մասին այսօր՝ հունիսի 1-ին ԱԺ–ում լրագրողների հետ զրույցում նշել է ԿԸՀ նախագահ Տիգրան Մուկուչյանը՝ պատասխանելով հարցին, թե արդյոք մատնահետքերի համակարգի ներդրումը ժամանակատար է։
«Սակայն, որքանով որ ես տեղեկացված եմ, մատնահետքով նույնականացման կյանքի կոչման հետ կապված եղել են բազմաթիվ խնդիրներ ու բարդություններ։ Իհարկե, պետք է նկատի ունենալ ինչ լուծումներ են ամրագրվում եւ պետք է հաշվի առնվեն ժամկետները, որ հնարավոր լինի դրանք լիարժեք կյանքի կոչել»,–նշել է նա։
Մուկուչյանի կարծիքով, շատ կարեւոր է, որ տեխնիկական լուծումները նոր թերություններ առաջ չբերեն. «Ընտրական իրավահարաբերություններում շատ կարեւոր է մի հանգամանք՝ ցանկացած, տեխնիկական լուծում պետք է լինի այնպիսին, որ հետագայում կիրառման ընթացքում ի հայտ չբերի թերություն։ Քանի որ ցանկացած թերության ի հայտ գալու պարագայում, նույնիսկ ամենալավ միջոցը, որը կոչված է հանրային վստահության բարձրացմանը, կարող է հակառակ ազդեցություն գործել»,–նշել է նա։