Եվրամիությունը 20 միլիոն եվրոյի չափով աջակցություն կապահովի «Թումո» ստեղծարար կենտրոնի հետ իրականացվող ծրագրին: Այս մասին, այսօր՝ հունիսի 2-ին, Եվրոպայի օրվա առթիվ կայացած միջոցառման ժամանակ լրագրողների հետ զրույցում նշեց Հայաստանում ԵՄ պատվիրակության ղեկավար, դեսպան Պյոտր Սվիտալսկին:
Նրա խոսքով, ԵՄ-ն վերջին 7 տարիների ընթացքում Երեւանին հատկացրել է 25 միլիոն եվրո. «Այս ամբողջն ուղղվել է Երեւանի մետրոպոլիտենի վերանորոգման աշխատանքներին եւ բարեկարգմանը, Նուբարաշենի աղբավայրի վերակառուցմանը, Երեւանում էներգաարդյունավետության ծրագրի իրականացմանը, ինչպես նաեւ փողոցային լուսավորության ապահովմանը: Մի ծրագրի շրջանակներում, որով համագործակցություն է իրականացվում «Թումո» ստեղծարար տեխնոլոգիաների կենտրոնի հետ, Եվրամիությունը կապահովի 20 միլիոն եվրոյի չափով աջակցություն: Այդպիսով՝ Եվրամիության ընդհանուր աջակցությունը Երեւանին կհասնի ավելի քան 40 միլիոնի»,- ասաց Սվիտալսկին:
Նշենք, որ այսօր՝ հունիսի 2-ին, Հյուսիսային պողոտայում անցկացվեց Եվրոպայի օրվան նվիրված տոնական միջոցառում:
