Ֆրանսիայի զինված ուժերի նախարար Ֆլորենա Փարլին կոչ է արել միջազգային հանրությանը պահպանել ճնշումը Հյուսիսային Կորեայի վրա մինչեւ միջուկային եւ հրթիռային ծրագրերի վերացումը: Հանդես գալով Ասիա-խաղաղօվկիանոսյան տարածաշրջանի անվտանգության հարցերով Shangri-La Dialogue միջազգային խորհրդաժողովին՝ նա հայտարարել է, որ դա միակ միջոցն է, որը կստիպի Փհենյանին երկխոսության գնալ, փոխանցում է ՏԱՍՍ-ը։

Նրա խոսքով, Ֆրանսիան «միացել է միջազգային պատժամիջոցների ռեժիմին եւ կարծում է, որ դրանք արդյունք են տալիս»:

Խոսելով հունիսի 12-ին Սինգապուրում նախապատրաստվող Հյուսիսային Կորեայի առաջնորդ Կիմ Չեն Ընի եւ ԱՄՆ նախագահ Դոնալդ Թրամփի հանդիպման մասին՝ նախարարը հայտարարել է, որ ողջունում է երկխոսությունը։ «Սակայն կարեւոր է գագաթնաժողովը գնահատել արդյունքներով։ Անբավարար կհամարվի, եթե չհաջողվի հասնել զանգվածային ոչնչացման զենքի, ինչպես նաեւ բոլոր բալիստիկ հրթիռների լրիվ, ստուգելի եւ անշրջելի վերացմանը»,-հավելել է Փարլին։

Նրա խոսքով, Հյուսիսային Կորեան կարող է պատրաստ չլինել միջուկային եւ հրթիռային ծրագրերի լրիվ եւ ստուգելի վերացմանը։ Նախարարը հավելել է, որ Փարիզը հույս ունի, որ Հյուսիսային Կորեա-ԱՄՆ գագաթնաժողովը Սինգապուրում, այնուամենայնիվ, կկայանա եւ որոշակի արդյունքներ կբերի։