ԱՄՆ պաշտպանության նախարար Ջեյմս Մետիսը հայտարարել է, որ Հյուսիսային Կորեայի նկատմամբ պատժամիջոցները կարող են մեղմացվել այն ժամանակ, երբ Փհենյանը միջուկային զինաթափման ստուգելի եւ անշրջելի քայլեր կձեռնարկի։ Այս մասին Պենտագոնի ղեկավարը հայտարարել է հունիսի 3-ին՝ Սինգապուրում Ճապոնիայի եւ Հարավային Կորեայի գործընկերների հետ հանդիպումից առաջ, փոխանցում է DW-ն։
Մետիսի կարծիքով, դեռեւս կարեւոր է պահպանել բոլոր պատժիչ միջոցները՝ սահմանված ՄԱԿ-ի բանաձեւերով։
Ճապոնիայի պաշտպանության նախարար Իցունորի Օնոդերան նույնպես պահանջել է շարունակել Հյուսիսային Կորեայի նկատմամբ կոշտ վերաբերմունքը։
Միաժամանակ, սակայն, Հարավային Կորեայի պաշտպանության նախարար Սոն Յոն Մուն հանդես է եկել Հյուսիսային Կորեային վստահելու դիրքերից։ «Եթե կասկածի տակ առնենք Կիմ Չեն Ընի դրդապատճառները, ապա կդժվարանա երկխոսությունը եւ առաջընթացը բանակցություններում»,-նշել է Հարավային Կորեայի պաշտպանության նախարարը։
