«Ավրորա» միջազգային մարդասիրական մրցանակի 2017թ. դափնեկիր, բժիշկ Թոմ Քաթինան կնոջ՝ Նասիմայի հետ այցելել է Ծիծեռնակաբերդի հուշահամալիր։ NEWS.am–ի թղթակիցը հայտնում է, որ Մեծ եղեռնի անմեղ զոհերի հիշատակը հավերժացնող անմար կրակի մոտ ծաղիկներ խոնարհելիս Նասիման չի կարողացել զսպել արցունքները։ Թոմ Քաթինան պարզաբանել է, որ հուշահամալիրը մինչեւ հոգու խորքը հուզել է նրան. «Երբ քո մեջ շատ ցավ կա, դու փորձում ես դրա մասին չմտածել, փորձում ես ճնշել, բայց հենց ցնցում է լինում, ինչպիսին մեր այցն էր այստեղ, միանգամից հիշում ես սեփական պատմությունը»,–ասել է նա։
Ապա հյուրերը ծառ են տնկել հուշահամալիրի Հիշողության պուրակում եւ ծանոթացել են Ցեղասպանության թանգարանի ցուցադրությանը: NEWS.am–ի թղթակցի հետ զրույցում Քաթինան հայտնել է, որ իր վրա ամենից շատ ազդեցություն է գործել հայ տղայի լուսանկարը, որտեղ նա ցույց է տալիս մեխերի հետքերով ձեռքերը։ Տղային խաչել էին, բայց նա հրաշքով փրկվել էր։
Թոմ Քաթինան ԱՄՆ-ի Նյու Յորք նահանգի Ամստերդամ քաղաքից է եւ «Ավրորա» մրցանակի դափնեկիր է հռչակվել 2017թ. մայիսի 28-ին։ Թոմ Քաթինան փրկել է հազարավոր կյանքեր՝ լինելով միակ մշտական վիրաբույժը Սուդանի մասը կազմող, սակայն այժմ պատերազմներից ավերված եւ մարդասիրական օգնությունից զրկված Նուբա լեռներում, ուր մարդասիրական օգնության մուտքն արգելված է։ «Ավրորա» մրցանակը, որը շնորհվում է «Ավրորա» մարդասիրական նախաձեռնության կողմից, ստեղծվել է Հայոց ցեղասպանությունը վերապրողների անունից՝ ի երախտագիտության նրանց փրկողների։
Քաթինան Հայաստան է ժամանել «Ավրորա 2018» մրցանակաբաշխությանը եւ դրան նվիրված միջոցառումներին մասնակցելու համար։