Շատերին թվում է, թե Հայոց ցեղասպանությունն ինչ-որ հեռավոր, 100 տարի առաջ տեղի ունեցած մի բան է եւ բացարձակապես կապ չունի այսօրվա հետ: Սակայն ցեղասպանություններ տեղի են ունենում եւ այսօր՝ 2018 թվականին, եւ եթե աշխարհը շարունակի ժխտել դրանք, ցեղասպանությունները կշարունակեն տեղի ունենալ: Այս մասին, այցելելով Հայոց ցեղասպանության զոհերի հիշատակի հուշահամալիր, ասել է բժիշկ միսիոներ, 2017 թվականի «Ավրորա» մրցանակի դափնեկիր Թոմ Քաթինան:
Թոմ Քաթինայի խոսքով՝ Ցեղասպանության ժխտումը շատ վտանգավոր է: «Քաղաքական պատճառներով շատ երկրներ չեն ճանաչում Հայոց ցեղասպանությունը: Բայց մենք պետք է սթափվենք եւ հասկանանք, որ Ցեղասպանությունն իսկապես եղել է: Չպետք է մտածել, որ Ցեղասպանությունն անցյալում է. այն տեղի է ունենում նաեւ հիմա եւ տեղի կունենա ապագայում, եթե մենք շարունակենք մերժել այն», - ասել է Քաթինան:
Նա հավելել է, որ Թուրքիան ժամանակին թույլ են տվել ժխտել Ցեղասպանությունը, հիմա դա թույլ են տալիս Սուդանին, իսկ հետագայում, եթե այսպես շարունակվի, ցեղասպանությունները կրկին կկատարվեն, եւ դրանց պատասխանատուներին թույլ կտան ամեն ինչ մերժել:
«Մենք պետք է նայենք խնդրի աչքերի մեջ, անունով կոչենք այն, մենք պետք է հասկանանք, որ դա տեղի է ունեցել եւ կարող է կրկին տեղի ունենալ, այլապես ոչինչ չի փոխվի»,- ասել է Քաթինան:
Հիշեցնենք, որ 2017 թվականի «Ավրորա» մրցանակի դափնեկիր, բժիշկ միսիոներ Թոմ Քաթиնան ԱՄՆ Նյու Յորք նահանգի Ամստերդամ քաղաքից է: Որպես միակ բժիշկ, որը մշտապես բնակվում է Սուդանի Նուբիական լեռների՝ պատերազմից ամայացած տարածքում, ուր մարդասիրական օգնություն գրեթե չի հասնում՝ Քաթինան հազարավոր կյանքեր է փրկել:
Մեկ միլիոն ԱՄՆ դոլարի չափով «Ավրորարա» մրցանակը Քաթինան կիսել է «Աֆրիկյան բժշկական առաքելություն» (AMHF, ԱՄՆ) հիմնադրամի, Aktion Canchanabury-ի (Գերմանիա) եւ Կաթոլիկ բժշկական առաքելության խորհրդի (CMMB, ԱՄՆ) միջեւ: Նա նաեւ անձնական մրցանակ էր ստացել՝ 100 հազար դոլարի չափով, որը խոստացել էր ծախսել հիվանդանոցի կարիքների համար:
