«Ավրորա» միջազգային մարդասիրական մրցանակի 2017թ. դափնեկիր, բժիշկ Թոմ Քաթինան Ցեղասպանության թանգարանում պատմել է, որ առավել տպավորել է երեխաների լուսանկարը, հատկապես տղայի լուսանկարը, որին փորձել են խաչել։ Լուսանկարում տղան վերքերով ձեռքի ափերն է ցույց տալիս։
«Դրան շատ ցավալի էր նայելը»,–ասել է Քաթինան NEWS.am–ի թղթակցի հետ զրույցում։
Այսօր՝ հունիսի 4-ին բժիշկը կնոջ՝ Նասիմայի հետ այցելել է Ծիծեռնակաբերդի հուշահամալիր։ Մեծ եղեռնի անմեղ զոհերի հիշատակը հավերժացնող անմար կրակի մոտ ծաղիկներ խոնարհելիս Նասիման չի կարողացել զսպել արցունքները։ Թոմ Քաթինան պարզաբանել է, որ հուշահամալիրը մինչեւ հոգու խորքը հուզել է նրան։
NEWS.am–ի հետ զրույցում Քաթինան պատմել է, որ սա արդեն իր երկրորդ այցն է Հայաստան եւ այդ հուշահամալիր։
«Լավագույն բառը, որը ես կընտրեի զգաստացնողն է։ Իսկապես զգաստացնում է։ Երբ հասկանում եմ, թե ինչ կարող են մարդիկ անել մյուս մարդկանց հետ, տխրում եմ»,–նշել է նա՝ հավելելով, որ հուշահամալիրը շատ կարեւոր է Հայոց ցեղասպանության մասին տեղեկության տարածման համար՝ դրա շնորհիվ մարդիկ կարող են իմանալ, որ ցեղասպանություն իսկապես եղել է։ «Մենք պետք է քայլեր ձեռնարկենք, ամեն հնարավորն անենք, որ կանխենք ցեղասպանության կրկնությունը»,–հավելել է Քաթինան։
Թոմ Քաթինան ԱՄՆ-ի Նյու Յորք նահանգի Ամստերդամ քաղաքից է եւ «Ավրորա» մրցանակի դափնեկիր է հռչակվել 2017թ. մայիսի 28-ին։ Թոմ Քաթինան փրկել է հազարավոր կյանքեր՝ լինելով միակ մշտական վիրաբույժը Սուդանի մասը կազմող, սակայն այժմ պատերազմներից ավերված եւ մարդասիրական օգնությունից զրկված Նուբա լեռներում, ուր մարդասիրական օգնության մուտքն արգելված է։ «Ավրորա» մրցանակը, որը շնորհվում է «Ավրորա» մարդասիրական նախաձեռնության կողմից, ստեղծվել է Հայոց ցեղասպանությունը վերապրողների անունից՝ ի երախտագիտության նրանց փրկողների։
Քաթինան Հայաստան է ժամանել «Ավրորա 2018» մրցանակաբաշխությանը եւ դրան նվիրված միջոցառումներին մասնակցելու համար։
