ԱՄՆ-ն եւ Թուրքիան աջակցություն են հայտնել Սիրիայի Մանջիբ քաղաքի իրավիճակի վերաբերյալ «ճանապարհային քարտեզին»՝ ընդգծելով այդ ծրագրի իրագործման փոխադարձ պարտավորությունը: Այս մասին նշվում է Վաշինգթոնում երկու երկրների արտգործնախարարների հանդիպումից հետո հրապարակված համատեղ հայտարարության մեջ, հաղորդում է «Ամերիկայի ձայնը»:
ԱՄՆ պետքարտուղար Մայք Պոմպեոն եւ Թուրքիայի արտգործնախարար Մեւլութ Չավուշօղլուն քննարկել են Սիրիայում հետագա համագործակցությունը եւ այն միջոցները, որոնք պետք է ձեռնարկվեն Մանջիբում կայունություն եւ անվտանգություն ապահովելու համար:
Զրուցակիցները նաեւ պայմանավորվել են հետագա հանդիպումներ անցկացնել երկկողմ խնդիրների լուծման նպատակով եւ նշել, որ երկու երկրները, որոնք ՆԱՏՕ-ի դաշնակիցներ են, շարունակում են կենտրոնանալ «դաշինքի եւ գործընկերության ոգով» ընդհանուր խնդիրների լուծման վրա: