Facebook ընկերությունը որոշել է այս շաբաթվա վերջին դադարեցնել Huawei–ի հետ գործընկերային համաձայնագիրը, որով չինական ընկերությանը հասանելիություն էր տրամադրվում այդ սոցիալական ցանցի օգտատերերի անձնական տվյալներին, փոխանցում է The New York Times–ը։
Վերոհիշյալ համաձայնագիրը Huawei–ի հետ կնքվել է 2010 թվականին եւ գործում է առ այսօր։
Կիրակի օրը The New York Times–ը տեղեկացրել է, որ Facebook–ը վերջին 10 տարվա ընթացքում նմանատիպ պայմանագրեր է կնքել հեռախոսներ, սմարթֆոններ եւ այլ էլեկտրոնային տեխնիկա արտադրող առնվազն 60 խոշոր ընկերությունների հետ։ Պարբերականը նշում է, որ կնքված պայմանագրերը կասկածի տակ են դնում Facebook ընկերության կողմից օգտատերերի տվյալների պաշտպանության սեփական կանոնները եւ ԱՄՆ առեւտրի հարցերով դաշնային հանձնաժողովի պահանջները։ Ընդ որում, սմարթֆոններ արտադրողները հասանելիություն են ստացել ոչ միայն սոցցանցի օգտատերերի, այլ նաեւ նրանց ընկերների տվյալներին առանց վերջիններիս համաձայնության։
Մարտին պարբերականը հաղորդել էր, որ ԱՄՆ իշխանությունները դիտարկում են ամերիկյան այն բջջային ու ինտերնետ կապի օպերատորներին սուբսիդիաներից զրկելու հնարավորությունը, որոնք ապրանքներ են գնում չինական հեռահաղորդակցության ոլորտի ընկերություններից, դրանց թվում նաեւ Huawei–ից։ Վաշինգթոնը բազմիցս պնդել է, որ այդ ընկերությունները, այդ թվում՝ Huawei–ն ու ZTE–ն համագործակցում են Չինաստանի հատուկ ծառայությունների հետ։
Facebook–ը սկանդալի կենտրոնում է հայտնվել Cambridge Analytica–ին սոցցանցի օգտատերերի տվյալները փոխանցելու The New York Times–ի հրապարակումից հետո։ Խոսքը, տարբեր գնահատականներով 87 մլն օգտատերերի տվյալների մասին է։ Ցուկերբերգը ապրիլին հանդես է եկել ԱՄՆ Կոնգրեսի երկու լսումներում։ Նա ամերիկյան օրենսդիրներին հավաստիացրել է, որ այուհետ իր ընկերությունում զգուշորեն կմոտենան օգտատերերի անձնական տվյալներին: