Երեւանի ընդհանուր իրավասության դատարանի Շենգավիթի նստավայրում այսօր՝ հունիսի 6-ին, շարունակվում է «Սասնա Ծռերի» գործով դատավարությունը:
Պաշտպանական կողմն այսօր նույնպես ամբաստանյալների խափանման միջոց կալանավորումը փոխելու վերաբերյալ միջնորդություններ են ներկայացնում: Նշենք, որ ամբաստանյալներից Արեգ Կյուրեղյանի համար «Ելք» խմբակցության պատգամավոր Լենա Նազարյանն ու Հրաչյա Հակոբյանն անձնական երաշխավորությսւն են ներկայացրել:
«Մեր խոսքով եւ մուծվող գումարով երաշխավորում ենք Արեգ Կյուրեղյանի պատշաճ վարքագիծը, քրեական վարույթն իրականացնող մարմնի կանչով նրա ներկայանալը եւ այլ դատավարական պարտականություններ կատարելը»,- ասված է պատգամավորների երաշխավորագրում:
Հիշեցնենք, որ «Սասնա ծռեր» խմբի գործով դատաքննությունը մի քանի ամիս շարունակ չէր սկսվում, նիստերն անընդհատ տապալվում էին, որից հետո որոշում կայացվեց գործը բաժանել 3 մասի: «Սասնա ծռեր» խմբի 11 անդամի մասով գործը քննում է Արտուշ Գաբրիելյանը Ավան եւ Նոր Նորք վարչական շրջանների ընդհանուր իրավասության դատարանում, իսկ անջատված մասերով երկու գործերը քննում են Կենտրոն եւ Նորք-Մարաշ վարչական շրջանների ընդհանուր իրավասության դատարանից գործուղված Մեսրոպ Մակյանն ու Էրեբունի եւ Նուբարաշեն վարչական շրջանների ընդհանուր իրավասության դատարանի նախագահ Արթուր Օհանյանը:
