2018 թվականին համաշխարհային տնտեսության աճի տեմպերը կմնան 3,1 տոկոս հաստատուն մակարդակում, չնայած վերջերս արձանագրված դանդաղմանը, սակայն հաջորդ 2 տարիներին աստիճանաբար կնվազեն զարգացած երկրներում տնտեսության աճի դանդաղման եւ ձեւավորվող շուկայական տնտեսությամբ երկրների ու զարգացող երկրների շարքից հումքի խոշոր արտահանողների տնտեսության վերականգնման էֆեկտի հարթման պատճառով: Այս մասին նշված է ՀԲ զեկույցում:
Կանխատեսումների համաձայն՝ Եվրոպայի եւ Կենտրոնական Ասիայի տնտեսությունների աճի տեմպերը առավել չափավոր կդառնան. 2018 թվականի ցուցանիշը վերանայվել է մեծացման ուղղությամբ եւ կկազմի 3,2 տոկոս, իսկ 2019-ին կնվազի մինչեւ 3,1 տոկոս, քանի որ հումք արտահանող երկրների տնտեսության որոշ աշխուժացումը միայն մասամբ կհավասարակշռվի հումք ներմուծող երկրներում անկմամբ:
Ըստ կանխատեսումների՝ Հայաստանում աճի տեմպերը 2018-ին կնվազեն մինչեւ 4,1 տոկոս (2017-ին՝ 7,5 տոկոս) եւ մինչեւ 4,0 տոկոս 2019-ին: Ադրբեջանում աճի տեմպերը կաճեն մինչեւ 1,8 տոկոս (2017-ին՝ 0,1 տոկոս) եւ մինչեւ 3,8 տոկոս 2019-ին: Վրաստանում աճի տեմպերը կաճեն մինչեւ 3,2 տոկոս 2018-ին (2017-ին՝ 3,0 տոկոս) եւ մինչեւ 3,4 տոկոս 2019-ին: Իրանում աճի տեմպերը կնվազեն մինչեւ 4,1 տոկոս 2018-ին (2017-ին՝ 4,3 տոկոս) եւ նախկին ցուցանիշների շրջանակում կմնան 2019-ին: Ըստ կանխատեսումների՝ Թուրքիայում աճի տեմպերը կնվազեն մինչեւ 4,5 տոկոս 2018-ին եւ մինչեւ 4,0 տոկոս 2019-ին:
Սպասվում է, որ Ռուսաստանում այս տարի աճի տեմպերը կայուն կմնան՝ 1,5 տոկոսի մակարդակում, իսկ հաջորդ տարի կաճեն մինչեւ 1,8 տոկոս, քանի որ նավթի գների աճի ազդեցությունը եւ դրամավարկային քաղաքականության մեղմացումը կթուլանան նավթի արդունահանման կրճատմամբ եւ տնտեսական պատժամիջոցների շուրջ իրավիճակի անորոշությամբ:
