ԱՊՀ Պաշտպանության նախարարների խորհրդի նիստի ժամանակ, որը չորեքշաբթի անցկացվել է Կըզըլում, միջկառավարական համաձայնագիր է ստորագրվել ռազմական նշանակության արբանյակային կապի համակարգերի օգտագործման մասին, փոխանցում է «ՌԻԱ Նովոստի»-ն:
«ԱՊՀ երկրների զինված ուժերի մարտական հնարավորությունների մեծացման շահերի շրջանակում միջկառավարական համաձայնագրեր են ստորագրվել ռազմական նշանակության արբանյակային կապի համակարգերի օգտագործման եւ դրանց հետագա կատարելագործման մասին: Ինչպես նաեւ՝ երկրատարածական տեղեկատվության փոխանակման ոլորտում համագործակցության մասին»,- նշված է նիստի արդյունքներով տարածված հաղորդագրության մեջ:
Նշվում է, որ ռազմական նշանակության համատեղ համակարգերի գործառնության կատարելագործման շրջանակում պաշտպանության նախարարները քննարկել են ԱՊՀ ՀՕՊ Միավորված առանցքի, Կապի համատեղ համակարգի, Պետական ռադիոտեղորոշման ճանաչման միասնական համակարգի, զինված ուժերի ավիացիայի թռիչքների անվտանգության եւ այլ համակարգերի հետագա զարգացման վերաբերյալ առաջարկները:
Մասնավորապես՝ հաստատվել է Բելառուսում ԱՊՀ ՀՕՊ Միավորված առանցքի համատեղ համակարգչային հրամանատարա-շտաբային՝ «Տարածաշրջանային անվտանգություն – 2018» զորավարժությունների անցկացումը: Ղազախստանում տեղի կունենան հակաօդային պաշտպանության զորքերի (ուժերի) օպերատիվ-տակտիկական հրամանտարա-շտաբային «Մաքուր երկինք – 2018» զորավարժությունները: Հավանություն են ստացել Կապի համատեղ համակարգերի զարգացման միջազգային պայմանագրային հիմքերը, ինչպես նաեւ վերլուծվել է 2017 թվականին զինված ուժերի ավիացիայի թռիչքների անվտանգության վիճակը, նշված է համատեղ մամուլի հաղորդագրության մեջ: