Ռուսաստանի Տուվայի շրջանում այսօր՝ հունիսի 6-ին, անցկացվում է ԱՊՀ երկրների պաշտպանության նախարարների խորհրդի նիստը, որին մասնակցում է նաև Հայաստանի պաշտպանության նախարար Դավիթ Տոնոյանը:
Ռուսաստանի պաշտպանության նախարար Սերգեյ Շոյգուն բացելով նիստը, ասել է, թե ԱՊՀ երկրները բախվում են ընդհանուր մարտահրավերների ու սպառնալիքների, առաջին հերթին միջազգային ահաբեկչության կողմից:
«Խորհրդանշական է, որ նիստն անցկացվում է Ասիայի աշխարհագրական կենտրոնում՝ Կիզիլում: Համատեղ սահմաններն ու պատմական կապերի ընդհանրությունը մեզ թույլ է տալիս վստահելի երկխոսություն ծավալել ամենահրատապ թեմաների շուրջ»,-ասել է նա:
Ռուսաստանի Տուվայի շրջանը գտնվում է Մոնղոլիայի հետ սահմանին: Պատվավոր հյուրի կարգավիճակով ԱՊՀ երկրների ՊՆ նախարարների խորհրդի նիստին առաջին անգամ մասնակցել է նաև Մոնղոլիայի պաշտպանության նախարարը:
Նիստի ընթացքում Սերգեյ Շոյգուն շնորհավորել է Դավիթ Տոնոյանին Հայաստանի պաշտպանության նախարար նշանակվելու կապակցությամբ՝ հաջողություն մաղթելով ազգային զինված ուժերի ամրապնդման գործում: Նույն մաղթանքով Շոյգուն շնորհավորել է նաև Ադրբեջանի ՊՆ նախարար Զաքիր Հասանովին՝ նրա ծննդյան օրվա կապակցությամբ:
