Տարածքային կառավարման եւ զարգացման նախարար Սուրեն Պապիկյանն այսօր ընդունել է Հայաստանի Հանրապետությունում Ամերիկայի Միացյալ Նահանգների արտակարգ եւ լիազոր դեսպան Ն.Գ. Ռիչարդ Միլսին եւ Ամերիկայի Միացյալ Նահանգների միջազգային զարգացման գործակալության ծրագրերի համակարգող Ադամ Շտեֆանին։
Ողջունելով հյուրերին՝ նախարար Պապիկյանը շնորհակալություն է հայտնել ԱՄՆ դեսպանին եւ ԱՄՆ ՄԶԳ-ին` տեղական ինքնակառավարման ոլորտում Հայաստանում իրականացվող բարեփոխումներին գործուն եւ մշտական աջակցության համար։ Խոսելով տեղական ինքնակառավարման մարմինների ապակենտրոնացման ու ժողովրդավարության ամրապնդման ուղղությամբ տարվող աշխատանքների մասին՝ նախարարն ասել է. «Թավշյա հեղափոփոխությունից հետո մեզ համար ստեղծվել է բացառիկ հնարավորություն՝ ձեւավորելու իրավամբ ժողովրդավարական երկիր, եւ այս ճանապարհին մեր կառավարությունը առանցքային է համարում տեղերում ժողովրդավարության հաստատումը»: Վարչատարածքային բարեփոխումների շրջանակներում իրականացվող համայնքների խոշորացման գործընթացում Ս. Պապիկյանն առանցքային է համարել հանրային մասնակցությունն ու հանրային լսումների կազմակերպումը եւ ընդգծել, որ խոշորացման գործընթացը պետք է տեղի ունենա ներքեւից` հանրության քննարկումների եւ ընդհանուր տեսլականի ձեւավորման պայմաններում, միաժամանակ հույս հայտնելով, որ այս հարցում կարող են ապավինել ԱՄՆ-ի աջակցությանը։
Իր խոսքում ԱՄՆ արտակարգ եւ լիազոր դեսպան Ռ. Միլսը մասնավորապես նշել է. «Շնորհավորանքներս Ձեր նշանակման կապակցությամբ: Տեղական ինքնակառավարման բարեփոխումները՝ համայնքների վարչական եւ ֆինանսական ապակենտրոնացման հետ մեկտեղ, հանդիսանում են առավել տոկուն ժողովրդավարության ու հանրության վստահության մեծացման կարեւոր գործոն: Մենք պատրաստ ենք շարունակել մեր աջակցությունը տեղական ինքնակառավարման բարեփոխումներին եւ նոր կառավարության մյուս առաջնահերթ խնդիրներին»: Դեսպանը հավելել է նաեւ, որ Հայաստանի համար հնարավորությունների նոր գլուխ է բացվել եւ Միացյալ Նահանգների կառավարությունը կանի հնարավորը՝ բարեփոխումների աշխատանքներում Հայաստանին օգտակար լինելու համար։
Հանդիպման ընթացքում կողմերը քննարկել են տեղական օղակներում ժողովրդավարության հաստատման, այդ գործընթացում քաղաքացիական հասարակության ակտիվ ներգրավվածության, ինչպես նաեւ համայնքների խոշորացման արդյունքում առաջացած դժվարությունների հաղթահարման եւ առկա խնդիրների առավել արդյունավետ լուծման ճանապարհներ գտնելուն միտված հարցեր։