Բրիտանական կառավարությունը գտնվում է ԵՄ-ի եւ Հայաստանի միջեւ համաձայնագրի վավերացման գործընթացում, եւ դա մեր առաջնահերթություններից մեկն է: Այս մասին հունիսի 7-ին բրիտանահայ գործարար համաժողովի բացման ժամանակ լրագրողների հետ զրույցում նշեց Հայաստանում Մեծ Բրիտանիայի դեսպան Ջուդիթ Ֆարնուորթը:
Դեսպանը շեշտեց, որ Հայաստանի եւ ԵՄ-ի միջեւ կնքված համաձայնագիրը չի կարելի ամբողջությամբ առեւտրային համաձայնագիր կոչել, սակայն այն հիմք է ծառայում Հայաստանում բարեփոխումներին մշտական աջակցության համար, որոնց նպատակը գործարար միջավայրի բարելավումն է:
«Նման համաձայնագրերը մանրակրկիտ կերպով ուսումնասիրվում են մեր բոլոր նախարարություններում: Մեծ Բրիտանիան խորհրդարանական ժողովրդավարություն է, եւ համաձայնագիրը պետք է քննարիվի խորհրդարանի կողմից: Խորհրդարանական գործընթացը կսկսվի առաջիկա մի քանի շաբաթվա ընթացքում, եւ մենք ակնկալում ենք, որ մի քանի ամիս անց այն կվավերացվի»,- ասաց դեսպանը: