Կառավարության ծրագրում պետք է լինեն թվեր։ Այս մասին այսօր՝ հունիսի 7-ին լրագրողների հետ զրույցում նշեց ՀՀԿ խմբակցության պատգամավոր Գեւորգ Կոստանյանը։
«Այն, որ կառավարության ծրագրում պետք է լինեն թվեր, նորություն չեն։ Զիմբաբվեի կառավարության գործունեության ծրագիրը որ բացեք, կտեսնեք թվեր։ Այլ հարց է, թե այդ թվերը ինչ ժամանակում են հասարակության համար տեսանելի դառնում»,-նշեց նա։
Կոստանյանը շեշտեց, որ ոչ մեկ չի վիճարկում, որ «մենք ունենանք տնտեսական աճ, բայց դրա արդյունքը հասարակությունը կտեսնի ավելի ուշ»։
Դիտարկմանը, որ այս դեպքում գործ ունենք ժամանակավոր կառավարության հետ, Կոստանյանը նկատեց․ «Հավերժ կառավարություններ չեն լինում, ամեն կառավարություն էլ ժամանակավոր է։ Եթե կառավարությունն իրեն համարում է ժամանակավոր, քաղաքացու համար ի՞նչ տարբերություն, նա ուզում է ամեն օր իր կենսամակարդակի բարձրացում տեսնել»։
Հարցին, թե ինչ իրավական փոփոխություններ կբերի հանգամանքը, որ ՀՀԿ-ն այլեւս մեծամասնություն չէ, Կոստանյանը պատասխանեց․ «Չի բերելու, կարող է բերել, բայց ինքնին դա չի ենթադրում փոփոխություններ։ Կարող է հիմք հանդիսանալ փոփոխությունների համար, բայց պարտադիր հետեւանք չի կարող լինել»։