Մոսկվան կշարունակի նպաստել Լեռնային Ղարաբաղի համար փոխադարձ ընդունելի լուծումների որոնմանը: Այս մասին Հայաստանի արտգործնախարար Զոհրաբ Մնացականյանի հետ բանակցություններից հետո հայտարարել է Ռուսաստանի արտգործնախարար Սերգեյ Լավրովը, փոխանցում է «ՏԱՍՍ»-ը:
Ըստ նրա՝ ՌԴ դիրքորոշումը մնացել է անփոփոխ: «Այն միշտ եղել է ԵԱՀԿ Մինսկի խմբի միջոցով լուծման դիրքորոշում, որի մասնակիցը Ադրբեջանի եւ այլ երկրների հետ միասին նաեւ Հայաստանն է: Մենք համոզված ենք, որ դա լավագույն ձեւաչափն է, եւ որպես Մինսկի խմբի համանախագահներից մեկը՝ ֆրանսիացի եւ ամերիկացիների հետ միասին մենք ընդհանուր շահագրգռված եւ ոչ հակասական գիծ ենք տանում պայմաններ ստեղծման համար, որոնք թույլ կտան համաձայնության գալ Բաքվի եւ Երեւանի հետ»,- ասել է նա:
«Եթե կողմերը որոշակի փուլում համաձայնության գան, որ Լեռնային Ղարաբաղը կրկին պետք է ներկա լինի բանակցություններում, դա կլինի նրանց որոշումը, մենք կհարգենք այդ որոշումը»,- հավելել է Լավրովը: «Այս աշխատանքը [Մինսկի խմբի] շարունակվում է երկար տարիներ, տարբեր փուլեր են եղել: Որոշ փուլերում Լեռնային Ղարաբաղի ներկայացուցիչները մասնակցել են այդ գործընթացին, ապա կողմերի համաձայնությամբ ձեւաչափը փոխվել է եւ դարձել այնպիսին, ինչպիսին հիմա է»,- նշել է ՌԴ ԱԳՆ ղեկավարը: