Ռուսաստանը պետք է գնա այն ամենի ազատականացման ճանապարհով, ինչը կապված է ՌԴ քաղաքացիություն ստանալու հետ: Այս մասին հայտարարել է Ռուսաստանի Դաշնության նախագահ Վլադիմիր Պուտինը՝ ուղիղ եթերում շփվելով Դոնեցկից եւ Լուգանսկից փախստականների հետ, փոխանցում է «Պարլամանտսկայա գազետա»-ն:
Պուտինի խոսքով՝ Ռուսաստանը պետք է գնա ՌԴ քաղաքացիության ձեռքբերման համակարգի ազատականացման ճանապարհով: ՌԴ նախագահը գտնում է, որ դա ունի ինչպես հումանիտար, այնպես էլ տնտեսական նշանակություն: 90-ականների ծնելիության կտրուկ անկման պատճառով այսօր երկրում ծնելիության տարիքի կանայք ավելի քիչ են:
«Ռուսաստանի համար խնդրի լուծման սակավ եղանակներից մեկը մեր հայրենակիցներին գրավելն է: Իհարկե, խոսքը բոլոր ազգերի եւ կրոնների ներկայացուցիչների մասին է, որոնք իրենց սերտորեն կապված են համարում ռուսական աշխարհի հետ, խոսում են ռուսերեն, ցանկանում են աշխատել մեր երկրում, համապատասխան լիազորություններ ունենալ»,- ընդգծել է Պուտինը:
Նա հավելել է, որ այս ոլորտում պետք է լուրջ եւ կտրուկ միջոցներ ձեռնարկվեն:Սակայն կարեւոր է նաեւ հաշվի առնել այս կամ այն մարզում ապրող Ռուսաստանի քաղաքացիների շահերը, ինչպես նաեւ՝ հաշվի առնել աշխատաշուկայում տիրող իրավիճակը:
