Մարդու իրավունքների հարցերը պետք է դառնան Վաշինգթոնի եւ Փհենյանի բանակցությունների հիմնական թեմաներից մեկը: Նման հայտարարությամբ է հանդես եկել ԿԺԴՀ-ի մարդու իրավունքների հարցերով ՄԱԿ-ի հատուկ զեկուցող Թոմաս Օխեա Քինտանան: Նա Հյուսիսային Կորեայի իշխանություններին կոչ է արել գագաթաժողովի նախաշեմին քաղաքական բանտարկյալների ազատ արձակման գործընթացը սկսել, որոնք, ըստ ՄԱԿ-ի փորձագետի, այս երկրում ավելի քան 80 հազար են:
ՄԱԿ-ի փորձագետը ողջունել է անցյալ ամիս ԿԺԴՀ-ում ձերբակալված երեք ամերիկացի քաղաքացիների ազատումը: Նա նշել է, որ Փհենյանի նման քայլը կարեւոր ներդրում է Կորեական թերակղզում եւ դրանից դուրս խաղաղության հասնելու գործում: Միեւնույն ժամանակ, Քինտանան կոչ է արել չմոռանալ Հյուսիսային Կորեայի բանտերում գտնվող տասնյակ հազարավոր քաղբանտարկյալների մասին: