«Արեւելյան գործընկերությունը» համագործակցության եւ երկխոսության հարթակ է: Այս մասին «Կոմերսանտ»-ին տված հարցազրույցում հայտարարել է Հայաստանի արտգործնախարար Զոհրաբ Մնացականյանը: ՀՀ ԱԳՆ-ի ղեկավարի խոսքով՝ եթե այդ հարթակը ուղղված է նրան, որպեսզի «համագործակցությունն ու երկխոսությունը կայանան ինչ-որ մեկի հաշին, ապա մենք չենք կարող մասնակցել նման հարթակի». «Դա դեմ է մեր սկզբունքներին: Եվ մենք՝ որպես մասնակիցներ, դա թույլ չենք տա: Մեր ներկայությամբ դա չի կարող տեղի ունենալ»:
Պատասխանելով հարցին, թե որն է այս գործընկերության շրջանակում Արեւմուտքի հետ Հայաստանի հարաբերությունների վերջնական կետը, Մնացականյանը նշել է, որ Հայաստանը ԵԱՏՄ-ի անդամ է: «Մենք համագործակցում ենք ԵՄ-ի հետ, օրակարգ ունենք ԱՄՆ-ի հետ: Օրակարգ կա նաեւ Վրաստանի եւ Իրանի հետ. դրանք մեր հարեւաններն են: Կարող եք կոչել դա վերջնական կամ որեւէ այլ կետ, սակայն մենք ձեւավորված ձեւաչափեր եւ համագործակցության հարթակներ ունենք, որոնք հաշվարկված են՝ ելնելով զարգացման եւ անվտանգության մեր տեսլականից: Մենք տեսնում ենք, որ այն ամենը, ինչ մենք արել ենք մինչեւ հիմա, ծառայում են այդ նպատակներին` զարգացմանն ու անվտանգության»:
Զոհրաբ Մնացականյանի խոսքով՝ «Արեւելյան գործընկերությունը» գործիք եւ գործիքակազմ է Հայաստանի զարգացման գործընթացի համախմբման համար: «Եթե դուք նայեք ԵՄ-ի հետ մեր պայմանագրի բովանդակությանը, ապա կան տարբեր բլոկեր՝ արդարադատություն, սեկտորալ ոլորտներ, փոխգործակցություն տարբեր քաղաքական հարթակներում: Այնտեղ հստակ երեւում է, թե ինչպես է դա համատեղելի ԵԱՏՄ-ում մեր անդամակցության հետ եւ ինչպես է դա ազդում Հայաստանի ամրապնդման վրա: Մենք վստահ ենք, որ ուժեղ եւ կայուն Հայաստանը լավ գործընկեր է», - ասել է նա: