Լեռնային Ղարաբաղը մեզ համար եղել եւ մնում է կոնկրետ անուններով կոնկրետ մարդկանց անվտանգության խնդիր. դա Լեռնային Ղարաբաղի բնակչությունն է: Այս մասին «Կոմերսանտ»-ին տված հարցազրույցում հայտարարել է Հայաստանի արտգործնախարար Զոհրաբ Մնացականյանը:
Նրա խոսքով՝ Լեռնային Ղարաբաղի բնակչության անվտանգությունն ու կարգավիճակը շարունակում է մնալ ամենակարեւոր հարցը Հայաստանի համար: «Լեռնային Ղարաբաղի 150 հազարանոց բնակչության անվտանգությունն այն խնդիրն է, որը միավորում եւ ամրապնդում է հայ հասարակությանը Հայաստանում եւ դրա սահմաններից դուրս: Մենք խելամիտ մարդիկ ենք եւ ամուր հիմքեր ունենք Լեռնային Ղարաբաղի անվտանգության եւ կարգավիճակի մասին մեր առաջնահերթ անհանգստության հարցերը բարձրացնելու համար: Մեզ տարածաշրջան է պետք, որը խաղաղ է ապրում, սակայն՝ ոչ մեր մարդկանց անվտանգության հաշվին: Այս շրջանակներում մենք ցանկանում ենք շարունակել բանակցային գործընթացը՝ հանուն ողջ տարածաշրջանի խաղաղության եւ անվտանգության»,- ասել է նա:
Պատասխանելով հարցին, թե ինչպիսին կլինի Հայաստանի դիրքորոշումը, եթե Ադրբեջանը որոշի գնալ ԵԱՏՄ-ին անդամակցելու ճանապարհով, Մնացականյանը պատասխանեց. «Ադրբեջանն այն երկիրն է, որն այսօր շրջափակում է Հայաստանը, միակողմանի միջոցներ է ձեռնարկում Հայաստանի դեմ»: Նա ընդգծել է, որ Բաքուն քաղաքականություն է վարում, որն ուղղված է փոխգործակցության ցանկացած գործընթացին, վստահության մթնոլորտի ստեղծմանը, մարդկային շփումների հաստատմանը չնպաստելուն. «Մենք գործ ունենք մի երկրի հետ, որն ամեն կերպ խթանում է ատելության մթնոլորտը: Նայեք նույնիսկ տերմինաբանությանը, որն օգտագործվում է Հայաստանի եւ ողջ աշխարհի հայերի դեմ: ԵԱՏՄ-ն համագործակցության կազմակերպություն է: Ի՞նչ եք դուք մեզանից ակնկալում»:
«Համագործակցությանը վերաբերող հարցերը քննարկելիս մենք չենք կարող անտեսել առկա իրողությունները: Իսկ իրողություններն այնպիսին են, որ մենք ունենք ցանկացած փոխհարաբերություններից բացարձակ հրաժարման իրավիճակ, նույնիսկ՝ մարդկային շփումներից, էլ չեմ խոսում տնտեսականի մասին: Այս դեպքում ինչի՞ մասին ենք մենք խոսում: Որ մենք դիտորդ ունենանք, ով անտեսու՞մ է երկրներից մեկին, ով կարծում է, որ այդ երկրի հետ չարժե անգամ խոսե՞լ»:
Պատասխանելով հարցին, թե որքանո՞վ է հնարավոր ղարաբաղյան հարցում փոխզիջումների ուղղությամբ շարժվելը՝ Մնացականյանն ասել է, որ հավատում է, որ դա հնարավոր է համարում: «Եվ հավատում եմ, որ խաղաղությունն ու կայունությունը տարածաշրջանում շատ կարեւոր են բոլորի համար: Բայց եթե դուք նկատել եք, մենք ուշադրություն ենք դարձնում եւս մի կետի. այս գործընթացները պետք է ընթանան խաղաղության համար նպաստավոր կլիմայում: Կարեւոր է, թե ինչ մթնոլորտում են ընթանում բանակցությունները. մթնոլորտում, որը նպաստում է խաղաղությանը, թե՞ մթնոլորտում, որը նպաստում մարդկանց՝ իրար ավելի շատ ատելուն»:
