Էներգետիկ ենթակառուցվածքների եւ բնական պաշարների նախարար Արթուր Գրիգորյանը չի բացառում, որ Ռուսաստանից ներկրվող գազի գինը տարեվերջին կարող է բարձրանալ:
Այսօր՝ կառավարության նիստից հետո լրագրողների հետ զրույցում պատասխանելով հարցին, թե հնարավո՞ր է, որ Ռուսաստանից ներկրվող գազի գինը տարեվերջին սահմանին բարձրանա, նախարարը պատասխանեց. «Պայմանագիրը տարեվերջին պետք է թարմացվի: Հնարավոր է, թե հնարավոր չէ, թույլ տվեք այս պահին չարտահայտվեմ, գազի գնի վերաբերյալ քննարկումները կսկսվեն նոյեմբերին: Երբ սկսվեն քննարկումները, մենք ձեզ տեղյակ կպահենք»:
Հարցին, թե եթե ՌԴ-ն գնա նման քայլի, հնարավո՞ր է Հայաստանը բանակցություններ սկսի Իրանի հետ, այդ երկրից գազ գնելու հարցի շուրջ, Արթուր Գրիգորյանը պատասխանեց. «Եթե գնա նման քայլի, ամեն բան էլ հնարավոր է, մենք շահագրգռված ենք, որ Հայաստան ներկրենք էժան գազ»:
Հիշեցնենք, որ ավելի վաղ նախարար Արթուր Գրիգորյանը նշել էր, որ սահմանին ռուսական գազը արժի 150 դոլար հազար խմ-ի համար, իսկ իրանական գազը՝ 165 դոլար:
