Սարի թաղի գործով ամբաստանյալ Հրայր Իսախանյանի պաշտպան Գրիշա Բալասանյանն այսօր՝ հունիսի 8-ին, Երեւանի ւընդհանուր իրավասության դատարանի Շենգավիթի նստավայրում միջնորդեց փոխել իր պաշտպանյալի խափանման միջոցը:
Պաշտպանը որպես հիմք նշեց այն, որ Հրայր Իսախանյանը ունի առողջական խնդիրներ, ընտանիքն էլ ծանր սոցիալական պայմաններում է ապրում, խնամքին էլ անչափահաս երեխա ունի:
Պաշտպան Լիպարիտ Սիմոնյանն էլ միջնորդեց փոխել խափանման միջոցը իր պաշտպանյալների Հարություն Թորոսյանի, Անդրանիկ Քյոսեյանի եւ Էդուարդ Զեյթունյանի համար:
Լիպարիտ Սիմոնյանը նշեց, որ Հարություն Թորոսյանը նախկինում դատապարտված չի եղել, ունի առողջական խնդիրներ, Էդուարդ Զեյթունյանն էլ դատապարտված է եղել, սակայն այնուհետ արդարացվել է, իսկ Անդրանիկ Քյոսեյանը քանի որ նախկինում դատվածություն է ունեցել առաջարկում է նրա խափանման միջոցը փոխարինել ստորագրություն չհեռանալու մասին կամ գրավով:
Մեղադրողն էլ հայտարարեց, որ Հարություն Թորոսյանի եւ Հրայր Իսախանյանի, Էդուարդ Զեյթունյանի խափանման միջոցը փոխելու միջնորդության դեմ չի առարկում, իսկ Անդրանիկ Քյոսեյանի խափանման միջոցը փոխելու միջնորդության դեմա առարկում է քանի որ դատվածություն ունի:
Դատավոր Աննա Դանիբեկյանը հեռացավ խորհրդակցական սենյակ, որոշումը կհրապարակվի այսօր:
Սարի թաղի բնակիչներ Հարություն Թորոսյանը, Հրայր Իսախանյանը, Անդրանիկ Քյոսեյանը եւ Էդուարդ Զեյթունյանը մեղադրվում են ՊՊԾ գնդի գրավումից հետո, մասնավորապես՝ հուլիսի 19-ին, Սարի թաղում միջադեպի ժամանակ ոստիկանների հանդեպ բռնություն գործադրելու մեջ:
Հիշեցնենք, որ մի քանի օր շարունակ Սարի թաղում ջուր եւ գազ չի եղել, դեպի Խորենացի փողոց՝ ՊՊԾ գնդի կողմ տանող ճանապարհն էլ փակ է եղել (տարածքը գրավված էր «Սասնա ծռեր» զինված խմբի կողմից), ինչի պատճառով բնակիչները դուրս էին եկել փողոց բողոքելու. նրանց եւ ոստիկանների միջեւ բախում էր տեղի ունեցել: