ՀՀ էներգետիկ ենթակառուցվածքների եւ բնական պաշարների նախարար Արթուր Գրիգորյանը հունիսի 8-ին ընդունել է Հայաստանի Հանրապետությունում Ամերիկայի Միացյալ Նահանգների արտակարգ եւ լիազոր դեսպան Ռիչարդ Միլսին:
Քննարկվել է երկկողմ հետաքրքրություն ներկայացնող հարցերի լայն շրջանակ:
Ողջունելով դեսպանին՝ նախարարը բարձր է գնահատել հայ-ամերիկյան փոխգործակցությունը եւ համոզմունք հայտնել, որ այսուհետ եւս երկկողմ տնտեսական հարաբերությունները կընդլայնվեն ու կզարգանան: Այդ համատեքստում նախարարը շնորհակալություն է հայտնել ԱՄՆ կառավարության կողմից էներգետիկայի եւ բնական պաշարների ոլորտներում Հայաստանին ցուցաբերվող շարունակական աջակցության համար եւ վերահաստատել հայկական կողմի պատրատակամությունը գործընկերության ամրապնդման ուղղությամբ:
Զրուցակիցներն անդրադարձել են նաեւ Հայաստանի էլեկտրաէներգետիկական շուկայի ազատականացման ուղղությամբ իրականացվող ծրագրերին։ Նախարարն ընդգծել է, որ էներգետիկ շուկայի ազատականացումը կառավարության գերակայություններից է։
«Հաշվետու, բաց եւ մրցունակ էներգետիկ շուկան էական դերակատարում ունի թափանցիկության մեծացման եւ ներդրումների ներգրավման համար, ինչը գերակայություն է Հայաստանի եւ Միացյալ Նահանգների համար»,- ասել է դեսպանը:
Ռիչարդ Միլսը նշել է, որ դեսպանությունն ու նախարարությունը համագործակցության մեծ փորձ ունեն, եւ վստահեցրել, որ Արթուր Գրիգորյանի պաշտոնավարման ընթացքում սերտ գործընկերությունն էներգետիկ ոլորտում կշարունակվի: