Հայոց ցեղասպանության չճանաչման քաղաքականությունն իրականության մեջ արդարացում չունի: Այս մասին հունիսի 8-ին Երեւանում լրագրողների հետ զրույցում ասաց ՄԱԿ-ում ԱՄՆ նախկին դեսպան Սամանթա Փաուերը:
Նրա խոսքով՝ Սպիտակ տանը հայտնվելով, Օբաման հասկացրեց, որ իր տեսակետը չի փոխվել: Սակայն այնուհետեւ նա համարեց, որ հայ-թուրքական հարաբերությունների կարգավորումը կարեւոր եւ փխրուն փուլում է: Հետո եղավ 100-ամյա տարելիցը, բայց հենց այդ ժամանակ Թուրքիան բազային հասանելիություն տվեց ԻԼԻՊ-ի դեմ պայքարում: «Սակայն այս ամենն արդարացում չէ»,- շեշտեց նա՝ հավելելով, որ մշտապես գոյություն կունենան մի շարք հանգամանքներ, որ դա չարվի:
Խոսելով պատճառների մասին, թե ինչու ԱՄՆ-ն չի ճանաչում Հայոց ցեղասպանությունը, Փաուերը նշեց, որ Թուրքիան մեծ եւ հզոր դաշնակից է, ու Էրդողանի սպառնալիքները կարող էին լուրջ ընկալվել:
Սակայն ընդամենը 20 տարի առաջ հնարավոր չէր պատկերացնել, որ շատ երկրներ, ինչպիսին է Գերմանաին, կամ Հռոմի պապը Ցեղասպանությունը կճանաչեն, ուստի, հնարավոր է, որ ԱՄՆ-ում նոր սերունդներն այլ կերպ կվարվեն: