Հունիսի 9-ին Հայաստանում Ամերիկյան համալսարանում ընթանում է շրջանավարտներին դիպլոմներ հանձնելու արարողությունը, փոխանցում է NEWS.am-ի թղթակիցը:
Միջոցառմանը մասնակցում են բուհի շրջանավարտները, նրանց ազգականները, ընկերները, ծնողները, ինչպես նաեւ համալսարանի դասախոսները, բուհի ղեկավարությունը, Կրթության եւ գիտության նախարարության ներկայացուցիչները՝ նախարար Արայիկ Հարությունյանի ղեկավարությամբ:
Հանդիսավոր միջոցառման մեկնարկն ազդարարեցին Հայաստանի Հանրապետության եւ Ամերիկայի Միացյալ Նահանգների հիմները: Այնուհետեւ ելույթ է ունեցել Հայաստանի Ամերիկյան համալսարանի նախագահ, պրոֆեսոր Արմեն Տեր-Կյուրեղյանը:
«Մենք անչափ ուրախ ենք, որ նախարար Արայիկ Հարությունյանն այսօր մեզ հետ է: Ուսանողները, շրջանավարտները, պրոֆեսորա-դասախոսական կազմը եւ Հայաստանի Ամերիկյան համալսարանի աշխատակիցները շնորհակալ են նաեւ «Հայաստանի Ընդհանուր բարեգործական միությանը»,- նշեց նախարարը:
Ելույթ ունեցավ «Ավրորա» մարդասիրական նախաձեռնության համահիմնադիր, Flagship Ventures ընկերության կառավարիչ գործընկեր, դոկտոր Նուբար Աֆեյանը: Նա, մասնավորապես, նշեց, այս պահից շրջանավարտները պետք է իրենց համար որոշեն՝ ինչպիսին է լինելու իրենց ապագան, իրենք ինչպիսին են ուզում այն տեսնել, ինչով են նախատեսում զբաղվել եւ ինչ բարձունքների են մտադիր հասնել, քանի որ դա նրանց կյանքում վճռորոշ նշանակություն է ունենալու:
Նշենք, որ այս տարի Հայաստանի Ամերիկյան համալսարանի ավարտական դիպլոմներ կստանան 500-ից ավելի շրջանավարտներ: