Լա Մալբեում ընթացող G7 գագաթաժողովում երկրների ղեկավարները որոշել են 3,8 միլիարդ կանադական դոլար (ավելի քան 2,9 միլիարդ դոլար) ուղղել ճգնաժամային եւ աղքատ երկրներում կանանց որակյալ կրթություն ստանալու հնարավորությունները բարձրացնելու տարբեր ծրագրերին: Այս մասին ասվում է շաբաթ Կանադայի վարչապետ Ջասթին Թրյուդոյի մամուլի ծառայության տարածած հայտարարության մեջ, հաղորդում է ՏԱՍՍ-ը:
«Կանադան, ԵՄ երկրները, Գերմանիան, Ճապոնիան, Միացյալ Թագավորությունը եւ Համաշխարհային բանկը այսօր հայտարարում են գրեթե 3.8 մլրդ կանադական դոլարների ներդրման մասին, որը նախատեսված է ողջ աշխարհում որակյալ կրթության մատչելիության բարձրացման եւ խոչընդոտները վերացնելու համար հիմք դնելուն»,-նշվում է փաստաթղթում: Դրանում ընդգծվում է, որ սա խոշորագույն ներդրում է ճգնաժամային եւ հակամարտող երկրներում կանանց եւ աղջիկների կրթության ոլորտում:
«Գենդերային հավասարությունը մարդու գլխավոր իրավունքներից է եւ G7-ում Կանադայի նախագահության ընթացքում կարեւոր առաջնահերթություն է եղել», - ասվում է հայտարարության մեջ: